იუსტიციის მინისტრი პაატა სალია N16 პენიტენციურ დაწესებულებაში გამართულ მსჯავრდებულთა კულინარიულ კონკურსს დაესწრო.
კულინარიულ კონკურსში ფინალურ ეტაპზე სასწავლო კურსის ფარგლებში გადამზადებული ოთხი მსჯავრდებული მონაწილეობდა. მათ მიერ მომზადებული კერძები სპეციალურად მოწვეულმა ჟიურიმ შეაფასა.
კურსის მონაწილეებმა ქართული და ევროპული სამზარეულოს სხვადასხვა სახეობის კერძის მომზადება პროფესიულ დონეზე შეისწავლეს. კურსის დასრულების შემდეგ, მსჯავრდებულებს გადაეცათ ორენოვანი სერტიფიკატები, რაც მათ შესაძლებლობას მისცემს, საპატიმრო დაწესებულების დატოვების შემდეგ, როგორც საქართველოში, ასევე, ქვეყნის ფარგლებს გარეთ დასაქმდნენ.
კულინარიული ნაწარმის მომზადების ტექნოლოგიის კურსი იუსტიციის სამინისტროს სსიპ მსჯავრდებულთა პროფესიული მომზადებისა და გადამზადების ცენტრისა და განათლების, მეცნიერებისა და ახალგაზრდობის სამინისტროს თანამშრომლობით, კოლეჯ „იკაროსის“ მხარდაჭერით 2024 წელს დაიწყო. პროექტის ფარგლებში ჯამში 40 მსჯავრდებული გადამზადდა.
ღონისძიებას ესწრებოდნენ იუსტიციის მინისტრის მოადგილე ალექსანდრე მაისურაძე, განათლების, მეცნიერებისა და ახალგაზრდობის მინისტრის მოადგილე თამარ მახარაშვილი, მსჯავრდებულთა პროფესიული მომზადებისა და გადამზადების ცენტრის დირექტორი თამთა დემურიშვილი, სპეციალური პენიტენციური სამსახურის ხელმძღვანელი ბეჟან ობგაიძე, კოლეჯ „იკაროსის“ დირექტორი რუსუდან ჩართოლანი და სხვა მოწვეული სტუმრები.