„საქართველოს სტრატეგიული პარტნიორობა ამერიკის შეერთებულ შტატებთან 33 წლის წინ მართალია, როგორც დამოუკიდებელ სახელმწიფოსთან შედგა, მაგრამ არა სუვერენულთან,“ – წერს სოციალურ ქსელში პარტია „ხალხის ძალის“ წევრი თამარ ჩიბურდანიძე. ექსპერტის თქმითვე, ირაკლი კობახიძის მიერ დონალდ ტრამპისადმი გაკეთებული შეთავაზება ორ ქვეყანას შორის ურთიერთობების გადატვირთვასთან დაკავშირებით, იმით არის მნიშვნელოვანი, რომ ეს სუვერენული სახელმწიფოს სტატუსის მქონე ქვეყანასთან ურთიერთობების ახლებურად დაწყებას ნიშნავს, რაც თვისობრივად ცვლის საქართველო-ამერიკას შორის თანამშრომლობის სტრატეგიას.
„საქართველოს სტრატეგიული პარტნიორობა ამერიკის შეერთებულ შტატებთან 33 წლის წინ მართალია, როგორც დამოუკიდებელ სახელმწიფოსთან შედგა, მაგრამ არა სუვერენულთან. გასული საუკუნის 90-იან წლებში, ქვეყანა სახელმწიფოებრიობას და დიდ ქვეყნებთან თანამშრომლობას ერთდროულად სწავლობდა და აყალიბებდა. პოსტსაბჭოთა პერიოდში, როდესაც არათუ გლობალურ პოლიტიკაში, არამედ რეგიონშიც კი საქართველოს როლი და ადგილი არ იყო გამოკვეთილი, ამერიკასთან სტრატეგიული თანამშრომლობაც ბუნებრივია, არათანასწორუფლებიან პირობებში დაიწყო და ასე მოვიდა დღემდე. ეს კიდევ უფრო გაამძაფრა ძლიერი აგენტურის ამოქმედებამ ქართულ პოლიტიკაში.
საქართველოს პრემიერის შეთავაზება დონალდ ტრამპისადმი ურთიერთობების გადატვირთვაზე, მნიშვნელოვანია იმით, რომ ეს ურთიერთობების ახლებურად დაწყებაა სუვერენული სახელმწიფოს სტატუსით, რაც თვისობრივად ცვლის საქართველო-ამერიკას შორის თანამშრომლობის სტრატეგიას. მრავალვექტორულ სამყაროში ტრამპმა იცის, რომ ამერიკა ვეღარ იქნება ერთადერთი სტრატეგიული პარტნიორი საქართველოსთვის. ამჟამად სწორედ სტრატეგიულ პარტნიორებს შორის უპირატესობის მოპოვების მცდელობა მიმდინარეობს. ტრამპის მოლოცვის შემდეგ პირველი ეტაპი დასრულდა, ლეგიტიმაციის თემა დღის წესრიგიდან ამოაღებინეს ოპოზიციას. დაიწყო ასევე რთული და კიდევ უფრო საინტერესო მეორე ეტაპი – უშუალოდ ურთიერთობების დალაგება. ისეთი ატმოსფეროა, თითქოს ახლა ვიწყებთ თავიდან ამერიკის შეერთებულ შტატებთან თანამშრომლობას, ასეც არის – დამთავრდა არასწორი ურთიერთობების პერიოდი და დაიწყება რეალური და სუვერენულ უფლებებზე დაფუძნებული პარტნიორობა. ამისათვის ბრძოლის რთული გზა განვლო ხელისუფლებამ მხარდამჭერებთან ერთად და დღეს უკვე ახალი პოზიციიდან სასურველი შედეგის მიღება სრულიად შესაძლებელია,“ – წერს თამარ ჩიბურდანიძე.