საქართველოს საგარეო საქმეთა მინისტრს, ილია დარჩიაშვილსა და ისრაელის სახელმწიფოს საგანგებო და სრულუფლებიან ელჩს, რან გიდორს შორის, რომელიც საქართველოში თავის მისიას ასრულებს გამოსამშვიდობებელი შეხვედრა გაიმართა, – ამის შესახებ ინფორმაციას საგარეო საქმეთა სამინისტრო ავრცელებს.
მათივე ინფორმაციით, შეხვედრის ფარგლებში, განიხილეს ორ ქვეყანას შორის არსებული პარტნიორობის აქტუალური საკითხები და სამომავლო თანამშრომლობის პრიორიტეტები. საუბარი ასევე შეეხო თანამშრომლობას საერთაშორისო ორგანიზაციების ფარგლებში. კმაყოფილებით აღინიშნა, რომ საქართველოსა და ისრაელის ურთიერთობები დინამიკურად ვითარდება როგორც ორმხრივ, ისე მრავალმხრივ ფორმატებში.
ხაზი გაესვა საქართველოს პრემიერ-მინისტრის განხორციელებულ ოფიციალურ ვიზიტს ისრაელში და მის მნიშვნელობას.
ისრაელის ელჩმა მადლობა გადაუხადა მინისტრს ნაყოფიერი თანამშრომლობისთვის და კიდევ ერთხელ დაადასტურა ისრაელის მტკიცე მხარდაჭერა საქართველოს სუვერენიტეტისა და ტერიტორიული მთლიანობის მიმართ.
ილია დარჩიაშვილმა თავის მხრივ მადლობა გადაუხადა ელჩ რან გიდორს საქართველოში გაწეული მუშაობისთვის და წარმატება უსურვა მომავალ საქმიანობაში.