სათქმელი ერთია, ყველამ უნდა გაიგოს ერთი რამ: იმ ფორმით, რა ფორმითაც მათ აირჩიეს ცხოვრება, მათთვის უტოპიაა, ჩემთვის მტკივნეული სიტუაციაა. ამ ხალხის და რეგიონის ეკონომიკური განვითარება, ხვალ ან ზეგ, მაინც საქართველოს ფარგლებში მოხდება, – ამის შესახებ, 2006-2022 წლებში სამხრეთ ოსეთის ადმინისტრაციის ხელმძღვანელმა, დიმიტრი სანაკოევმა, საქართველოს პარლამენტის დროებითი საგამოძიებო კომისიის სხდომაზე განაცხადა.
როგორც სანაკოევმა აღნიშნა, დროებით ოკუპირებული ცხინვალის რეგიონის მოსახლეობა, თავადაც კარგად ხვდება, რომ ყველაფრით რუსეთზე არიან დამოკიდებული და ერთ დღეს, შესაძლოა ეს წყარო გადაიკეტოს, რაც მათ ფინანსებისა თუ ბიუჯეტის გარეშე დატოვებს.
მისივე თქმით, იურიდიულად, კონსტიტუციით და ყველანაირად, ეს ტერიტორია საქართველოსია და იქ მცხოვრებმა მოსახლეობამ უნდა გაიგოს, რომ ჩვენი, ყველას სამშობლო საქართველოა.
“შეიძლება ის რესურსი, რომელიც იქ არის, სწორად გამოვიყენოთ და ვიგრძნოთ, მივცეთ საშუალება, რომ იგრძნონ, საქართველო არის მათი სამშობლოც, ჩვენი, ყველას სამშობლო. თვითონაც კარგად ხვდებიან, რომ თავისი ფინანსებით, ბიუჯეტით – ყველაფრით დამოკიდებულები არიან რუსებზე, რუსულ ბიუჯეტზე. თვითონ რუსული ბიუჯეტი აძლევს ამათ თანხას, ნებისმიერ დროს შეიძლება ეს წყარო გადაიკეტოს და დარჩებიან ისე. ამიტომ, იურიდიულადაც, კონსტიტუციის ფარგლებშიც და ყველანაირად, ეს ტერიტორია არის საქართველოს ტერიტორია, აქ ცხოვრობს ოსი მოსახლეობა და მინდა, გაიგონ ერთი რაღაც, რომ ჩვენი სამშობლო საქართველოა და განვვითარდებით ერთად. ვიცი, რომ ტკივილია, იქ შეიძლება დღესაც გამოაცხადონ რომ მოღალატე ვარ, მაგრამ, სიმართლე მაინც ესაა და ხმამაღლა უნდა ვთქვათ. სახლში შეიძლება ბევრი ფიქრობს, რომ ასეა, მაგრამ გარეთ ვერ გამოვლენ და ვერ იტყვიან იმას, რასაც ახლა მე ვიძახი.” – აღნიშნა დიმიტრი სანაკოევმა.