„უბრალოდ, ცუდია, როდესაც ყოფილი პრემიერი იტყუება“,- ასე გამოეხმაურა საპარლამენტო უმრავლესობის ერთ-ერთი შალვა პაპუაშვილი გიორგი გახარიას განცხადებას თამარ ჟვანიას ცესკო-ს თავმჯდომარის პოსტიდან გადადგომასთან დაკავშირებით.
„ალბათ, არ დააკვირდა, რომ მთლიანად ამ პროცესში ქალბატონმა თამარ ჟვანიამ, უპირველეს ყოვლისა, გამოიჩინა დიდი სიმხნევე – მიუხედავად იმისა, რომ ნოემბრის დღეებში ის იყო ზეწოლისა და ძალადობის ენის სამიზნე, მან ბოლომდე მიიყვანა საარჩევნო ციკლი.
დადასტურდა, რომ ამ არჩევნებს არანაირი სისტემური ხარვეზი არ ჰქონია და რაიმე მანიპულაცია არ ყოფილა. მან ასევე საგამოძიებო კომისიასაც მისცა ახსნა-განმარტებები და, საბოლოო ჯამში, ჩვენ ვრწმუნდებით, რომ მთლიანი კამპანია გაყალბებულ არჩევნებთან დაკავშირებით თავად იყო ყალბი.
ვფიქრობ, თამარ ჟვანიამ თავისი ვალი ბოლომდე მოიხადა იმ კუთხით, რომ 2020 წლის არჩევნებთან დაკავშირებით არ დარჩენილიყო რაიმე პასუხგაუცემელი კითხვა. როგორც ჩანს, მან გადაწყვიტა, რომ ახლა უმჯობესი იქნებოდა, პროფესიული განვითარების სხვა ეტაპზე გადასულიყო. დარწმუნებული ვარ, ასეთი გამოცდილი პროფესიონალი შეძლებს იგივე საარჩევნო სფეროში საინტერესო კარიერის წარმართვას“, – აღნიშნა პაპუაშვილმა.
