ჩვენ ჩავატარებთ აქციას 18-ში და შინაარსობრივად შევუერთდეთ როგორც 16-ის, ისე 20-ის აქციას,- ამის შესახებ პარტია „გირჩის“ წევრმა, დეპუტატმა ვახტანგ მეგრელიშვილმა განაცხადა.
„ჩვენ ფაქტობრივად ჩვენი დამოკიდებულებით ნებისმიერ აქციას შევუერთდებოდით. შევუერთდებოდით როგორც „ქართული ოცნების“ მიერ ორგანიზებულ ან ნებისმიერ აქციას, რომელიც გულწრფელად ირჩევდა ქვეყნის ევროკავშირში განვითარებას. მაგრამ გამოვიდა, რომ ეს ამბავი ასე არ არის. ისევ „ნაცებისა“ და „ქოცების“ დაპირისპირებაში აღმოვჩნდით. 16-ში, ასე გაფორმდა, რომ იქნება „ქართული ოცნების“ მხარდამჭერების აქცია და 20-ში „ნაციონალური მოძრაობის“ მხარდამჭერების. ერთადერთი, რაშიც მე ვარ დარწმუნებული, ჩვენ არასდროს უნდა დავიკავოთ მხარე. ჩვენ ჩავატარეთ გამოკითხვა, რომელი აქცია ერჩივნათ 16, 20 თუ 18 და ჩვენი მხარდამჭერების უმრავლესობამ 18 აირჩია. ამიტომ, ჯობია ჩვენ ჩავატაროთ აქცია 18-ში და შინაარსობრივად შევუერთდეთ როგორც 16-ის, ისე 20-ის აქციას. ჩვენთან მოსული ადამიანები მიითვალოს როგორც „ქართულმა ოცნებამ“, ისე „ნაციონალურმა მოძრაობამ“. თუ ასეთი მნიშვნელოვანი მდგომარეობა გვაქვს ქვეყანაში და ასეთ მნიშვნელოვან საკითხზე არ შეგვიძლია შევთანხმდეთ, მაშინ იყოს ასე, 18-ში შევიკრიბოთ ადამიანები, ვისაც არც „ქოცები“, არც „ნაცები“ და არც ეს დაპირისპირება მოგვწონს“, – აღნიშნა მეგრელიშვილმა.