სანქციები უსაფუძვლოა, ეს არის პოლიტიკური გადაწყვეტილება, – განუცხადა ჟურნალისტებს მოსამართლე დიმიტრი გვრიტიშვილმა.
მისი თქმით, მოსამართლის ან მათი ოჯახის წევრების მიმართ სანქციები მიუღებელია.
„რა თქმა უნდა, სანქციები უსაფუძვლოა, სამწუხაროდ, ეს არის გარკვეული პოლიტიკური დღის წესრიგით განპირობებული პოლიტიკური გადაწყვეტილება. ვიღაცას შეიძლება არ მოსწონდეს სასამართლოს გადაწყვეტილება, თუმცა აქედან გამომდინარე მოსამართლის ან მათი ოჯახის წევრების მიმართ სანქციების დაწესება მიუღებელია. აბსოლუტურად დაუსაბუთებელი და უსამართლოა, ყველანაირ ზღვარს სცდება მოსამართლეთა ოჯახის წევრებზე სანქცირების გავრცელება“, – აღნიშნა გვრიტიშვილმა.
დიდი ბრიტანეთის მთავრობამ საქართველოს იუსტიციის უმაღლესი საბჭოს წევრი, თბილისის სააპელაციო სასამართლოს მოსამართლე, ლევან მურუსიძე და თბილისის სააპელაციო სასამართლოს თავმჯდომარე, მიხეილ ჩინჩალაძე ისე დაასანქცირა, რომ განმარტებით ბარათში მოსამართლეების არაკეთილსინდისიერებაზე მხოლოდ ეჭვებსა და ვარაუდების დონეზეა საუბარი.