პარლამენტის ვიცე-სპიკერი, პარტია “ხალხის ძალის” თავმჯდომარე სოზარ სუბარი ბადრი ჯაფარიძისა და მამუკა ხაზარაძის მიერ საგამოძიებო კომისიისთვის თავის არიდების ფაქტს მედიასთან ეხმიანება.
დეპუტატმა აღნიშნა, რომ არსებობს უამრავი ფაქტი, რომ ბადრი ჯაფარიძე, მამუკა ხაზარაძე და მათ მიერ დაარსებული ბანკი ადამიანებისათვის ქონების ყაჩაღური გზით წართმევაში მონაწილეობდნენ. სოზარ სუბარის თქმით, ლელოს ლიდერები მიხვდნენ, რომ სასჯელისგან თავის არიდების მიზნოთ პოლიტიკისთვის თავის შეფარება ცუდი გადაწყვეტილება იყო, რადგან კითხვებზე პასუხების გაცემა საჯაროდ მათ არ შეუძლიათ, ამიტომ აარიდეს თავი საგამოძიებო კომისიას.
“დღემდე ყველამ იცოდა და უამრავი საგაზეთო სტატია თუ სატელევიზიო სიუჟეტი არსებობს, სადაც ადამიანები ჰყვებიან, რომ მათი ქონების ყაჩაღური გზით წართმევაში მონაწილეობდნენ ხაზარაძე, ჯაფარიძე და მათ მიერ დაარსებული ბანკი. როდესაც მათ [ხაზარაძეს და ჯაფარიძეს] საჯაროდ მოუხდათ ამ კითხვებზე პასუხის გაცემა, შეეშინდათ. მიხვდნენ, რომ თუ თავის დროზე სცადეს პოლიტიკისთვის თავის შეფარება სასჯელის ასარიდებლად (რასაც ვერ მიაღწიეს), დღეს პოლიტიკისთვის თავშეფარება კიდევ უარესია, რადგან საჯაროდ კითხვებზე პასუხების გაცემა მათ არ შეუძლიათ (კიდევ უფრო გამტყუნდებიან საზოგადოების თვალში). ამიტომ აარიდეს მათ თავი კომისიაზე გამოცხადებას,”- განაცხადა სოზარ სუბარმა.