გიორგი ვაშაძე აზრზე არ არის, ახლა რისი დროა და მისი წარსული პოლიტიკური ცხოვრება მხოლოდ ამას ადასტურებს, – ამის შესახებ „ფედერალისტების“ ლიდერმა, თამარ ჩერგოლეიშვილმა განაცხადა.
„დღეს არის ძლიერი პარტიების, დემოკრატიული პროცესის, ქვემოდან ზემოთ მომავალი პრიცესის დრო, როდესაც ხალხი წყვეტს, მათი წარმომადგენლები ვინ არიან და არა – ვაშაძის ბელადი ან ვაშაძის დონორი. ამისი დროა ახლა და ხალხი თვითონ განსაზღვრავს თავის წარმომადგენლებს, და პირიქით, ხალხი ითხოვს მრავალფეროვან არჩევანს, ძლიერ პარტიებს. ხალხი ითხოვს თავისი ინტერესების დაცვას, თავისი ინტერესებისთვის დებატებს და ამ პროცესს თუ წარმატება უწერია, ასე დასრულდება, როგორც მე ვამბობ და არა ისე, როგორც გიორგი ვაშაძე“, – განაცხადა ჩერგოლეიშვილმა.
კითხვაზე, აქვს თუ არა მას მოლოდინი, რომ ოპოზიციის გაერთიანება მოხერხდება, ჩერგოლეიშვილი პასუხობს, რომ მისი სურვილია, ხალხი მათ გარშემო გაერთიანდეს.
„არ ვიცი და არც მაინტერესებს. ჩვენ ვაშენებთ ჩვენს პარტიას და დაინტერესებულები ვართ ჩვენი პარტიის, ჩვენი ღირებულებების ირგვლივ ქართველი ამომრჩევლის გაერთიანებით, რადგან ჩვენ ვხედავთ, ვინ არის მთავარი აქტორი პოლიტიკური პროცესის, ეს არის ქართველი ხალხი. ამიტომ მინდა, ხალხი გაერთიანდეს ჩვენ გარშემო და არა პოლიტიკოსები ერთმანეთთის გარშემო“,- აღნიშნა თამარ ჩერგოლეიშვილმა.