საქართველოს თავდაცვის მინისტრი „დაჭრილ მებრძოლთა თანადგომის ფონდის“ ყოველწლიურ ღონისძიებას დაესწრო. ირაკლი ჩიქოვანმა თავდაცვის სამინისტროსა და ფონდის მხარდაჭერით დაჭრილ-დაშავებული სამხედროებისთვის გაწეულ მხარდაჭერაზე ისაუბრა და საზოგადოებას ღირსეულ საქმეში ჩართვისკენ მოუწოდა. „ეს ადამიანები არიან მაგალითი იმისა, თუ როგორ არ უნდა გატყდე, თუ როგორ უნდა ემსახურო სამშობლოს და იყო მაგალითი იმ ახალი თაობებისთვის, რომლებიც უერთდებიან თავდაცვის ძალებს. ჩვენ თავდაცვის ძალების დიდ ოჯახში ამ ადამიანებს „დაუმარცხებლებს“ ვუწოდებთ“, – აღნიშნა ირაკლი ჩიქოვანმა.
„დაჭრილ მებრძოლთა თანადგომის ფონდი” კომპანია „სილქნეტის“ პატრონაჟით 2018 წლიდან ფუნქციონირებს. მისი მთავარი მიზანი სხვადასხვა საბრძოლო მოქმედებასა თუ საერთაშორისო მისიაში დაჭრილ სამხედრო მოსამსახურეებსა და ვეტერანებზე ზრუნვაა. ფონდი თავდაცვის უწყებასთან ერთად დაჭრილ მებრძოლებს სამედიცინო მომსახურებით, კვლევებით, რეპროთეზირებით, სხვადასხვა სამედიცინო მიმართულებებით, უმაღლესი განათლებისა და პროფესიული გადამზადების კურსების დაფინანსებით უზრუნველყოფს.
საქველმოქმედო ღონისძიებაზე სიტყვით გამოვიდნენ „სილქნეტის“ სამეთვალყურეო საბჭოს თავმჯდომარე გიორგი რამიშვილი, ფონდის გენერალური დირექტორი დავით მამულაიშვილი, ნატოს სამხედრო მეკავშირე ოფიცერი, პოლკოვნიკი ბერატ თელი და ვეტერანების საქმეთა სახელმწიფო სამსახურის დირექტორი, გენერალ-მაიორი კობა კობალაძე.
საქველმოქმედო ღონისძიების ფარგლებში თავდაცვის მინისტრის მოადგილემ გელა გელაძემ და ფონდის გენერალურმა დირექტორმა დავით მამულაიშვილმა დაჭრილ-დაშავებული სამხედროებისა და მათი ოჯახის წევრების მხარდაჭერის მიზნით ხელი მოაწერეს მემორანდუმს, რომელიც ურთიერთთანამშრომლობასა და პარიტეტულ საწყისზე თანადაფინანსებას ითვალისწინებს.
ღონისძიებას თავდაცვის მინისტრის მოადგილეები, თავდაცვის ძალების მეთაური, გენერალ-მაიორი გიორგი მათიაშვილი, დაჭრილი სამხედრო მოსამსახურეები, ვეტერანები, ნატო-საქართველოს არსებითი პაკეტის ძირითადი ჯგუფის ლიდერი აემალ ბაჰადური, საქართველოში აკრედიტებული დიპლომატიური კორპუსის წარმომადგენლები ელჩები და სამხედრო ატაშეები, ბიზნესისა და საზოგადოების წარმომადგენლები დაესწრნენ.