„[ევროსაბჭოს საპარლამენტო ასამბლეაზე გაჟღერებული დათქმებით] იყო მცდელობა, რომ საქართველოს წინააღმდეგ ბერკეტად გამოეყენებინათ [ასამბლეის წევრობა]“, – ამის შესახებ მედიასთან „ხალხის ძალის“ საერთაშორისო ურთიერთობების მდივანმა ეკა სეფაშვილმა განაცხადა.
მისი თქმით, ევროსაბჭოს ასამბლეაზე გაჟღერებული დათქმები იმდენად ეწინააღმდეგება დემოკრატიულ პრინციპებს, რომ საქართველომ უარი განაცხადა ამ ორგანიზაციაში მონაწილეობაზე იქამდე, სანამ მათთან არ აღდგება ის ღირებულებები, რის გამოც არის ძვირფასი ეს ორგანიზაცია თუ ზოგადად, ევროპული ინტეგრაცია.
„უკვე ღიად მიმართავენ საქართველოზე ზემოქმედებებისთვის არასამართლიან და არაკომპეტენტურ ხერხებს. სხვათა შორის, უნდა აღინიშნოს, რომ ეს არასამართლიანი დამოკიდებულება მხოლოდ საქართველოს მიმართ არ არის. იქ იყო რუმინელი პარლამენტარი, რომელიც ცდილობდა, რომ ევროსაბჭოს ასამბლეას დაეწყო მოკვლევა რუმინეთში ჩატარებული არჩევნების შესახებ.
თუმცა, საჭირო რაოდენობით მომხრეების შეკრება ვერ შეძლო, მიუხედავად იმისა, რომ ძალიან ბევრი ეუბნებოდა, რომ მის პოზიციას იზიარებდა. რაც შეეხება ევროსაბჭოს ასამბლეის მმართველ გუნდს, ისინი მაქსიმალურად ცდილობდნენ საქართველოს პოზიციების მხარდაჭერას, მაგრამ ისინი არ არიან თავისუფლები თავიანთ გადაწყვეტილებებში, რადგან გადაწყვეტილებები პარლამენტარებში კენჭისყრის ხმის შედეგებით მიიღება. თუმცა ისინი მაქსიმალურად შეეცადნენ საქართველოსთვის რაც შეიძლება რბილი ყოფილიყო ეს გადაწყვეტილება და მათი თვალსაზრისით, ძალიან კარგი კომპრომისული ვარიანტი იყო ის, რომ საქართველოს უფლებამოსილება არ შეუჩერდა.
ანუ, საქართველოს მტრების გულგასახეთქად, საქართველოს ეს უფლებამოსილება [ევროსაბჭოში] შენარჩუნებული აქვს. თუმცა, დათქმები იმდენად უსამართლო იყო და იმდენად ეწინააღმდეგება დემოკრატიულ პრინციპებს, რომ უარი განვაცხადეთ ამ ორგანიზაციაში მონაწილეობაზე იქამდე, სანამ მათთან არ აღდგება ის ღირებულებები, რის გამოც არის ჩვენთვის ძვირფასი ეს ორგანიზაცია თუ ზოგადად, ევროპული ინტეგრაცია“, – აღნიშნა ეკა სეფაშვილმა.