პარლამენტის ვიცე-სპიკერი სოზარ სუბარი აშშ-ის მხრიდან ბიძინა ივანიშვილისთვის სანქციების დაწესების ფაქტს მედიასთან საუბარში გამოეხმაურა და განაცხადა, რომ სანქციებისთვის თავის არიდება ბიძინა ივანიშვილისთვის ძალიან მარტივი იყო, თუმცა ამის საპირწონედ ქვეყნის სუვერენიტეტი იყო.
„თუ ვინმე ფიქრობდა, რომ ბიძინა ივანიშვილი არ ელოდა სანქციებს, ან ძალიან გულუბრყვილოა ან პირიქით, ბიძინა ივანიშვილი ჰგონია გულუბრყვილო. სანქციების თავიდან არიდება, რა თქმა უნდა, ძალიან მარტივად შეიძლებოდა, უბრალოდ საფასური იქნებოდა ქვეყნის სუვერენიტეტთან დაკავშირებით უკან დახევა, რის შედეგადაც ჩვენს სამშობლოსთან დაკავშირებულ გადაწყვეტილებებს მიიღებდნენ ქვეყნის გარეთ და არა შიგნით.
ასევე, ჯერ კიდევ არ არის მოხსნილი მთავარი პრობლემა, რაც ბოლო 3 წლის განმავლობაში ავიცილეთ თავიდან, მაგრამ ჯერ კიდევ დამოკლეს მახვილივით ჰკიდია ჩვენი ქვეყნის და ხალხის თავზე – ეს არის ომში ჩართვის საშიშროება. შესაბამისად, საკითხი აქ ასე დგას – შეიძლება თუ არა სამშობლოს სიყვარული გაიცვალოს რამეზე? რა თქმა უნდა, ბიძინა ივანიშვილი არ არის ის ადამიანი, ვინც სამშობლოზე მაღლა რაიმეს დააყენებს. ასე რომ, ეს სანქციები არაფერს ცვლის. დე-ფაქტო სანქციები ივანიშვილის წინააღმდეგ ისედაც არსებობდა. ამერიკის საელჩო საქართველოში გვეუბნებოდა, ჩვენ არაფერ შუაში ვართ, ეს credit Suisse-ს და კერძო პირის დავააო. მას შემდეგ, რაც სასამართლო პროცესები მოიგო ბიძინა ივანიშვილმა და დაინახეს, რომ საქმე ვეღარ გაიწელებოდა, რეალურად აამოქმედეს სანქციები. ესაა რეალობაა, თუმცა ეს სანქციები ბიძინა ივანიშვილს ხელს ვერ შეუშლის, აკეთოს ის საქმეები, რაც ჩვენს ქვეყანას სჭირდება.