პარტია “ხალხის ძალის” წევრი დავით ქართველიშვილი ანჩისხატის ტაძრის დასავლეთ ფასადსა და კარზე კვერცხების სროლის ფაქტს სოციალურ ქსელში ეხმიანება.
“საუკუნეები ურჯულო ტომთა ოკუპაციაში იყო თბილისი – ანჩისხატისთვის კვერცხი კი არა, კენჭი არ დაუშენია არავის! “- წერს ექსპერტი და აღნიშნავს, რომ ეს არის ქრისტეს გამოსახულებიანი კუბოს დაწვის რიტუალის გაგრძელება და ერთგვარი გაფრთხილება სხვა ტაძრების მისამართით. მისი განმარტებით, ეს ფაქტი აღარ არის უწყინარი პერფორმანსი.
“ალბათ “ხარებას” სპეცრაზმელები იყვნენ არა? ომია! ომი! ფასეულობებსა და ცივილიზაციებს შორის! “დავიღალე” და “გვეშველება რამე” მე მაინც არ გამაგონოთ. ვისაც დანებება გსურთ – დანებდით. ვისაც ცხონება და გამარჯვება, იტვირთეთ ქრისტეს ჯვარი. ჯვრიდან – არ ჩამოდიან! ჯვრიდან – გარდამოიხსნებიან! ეს არის თბილისის უძველესი ტაძარი. ეს არის ჩვენი საუკუნეებით მრავალტანჯული დედაქალაქის სიმბოლო! საუკუნეები ურჯულო ტომთა ოკუპაციაში იყო თბილისი – ანჩისხატისთვის კვერცხი კი არა, კენჭი არ დაუშენია არავის! ეს არის სატანისტური რიტუალის გაგრძელება. სასახლეზე გამოსახული ქრისტე მაცხოვრის რიტუალური დაწვის გაგრძელება. შერჩეულ იქნა უძველესი ტაძარი დანარჩენი ეკლესიებისთვის გზავნილის სახით – “მალე თქვენც მოგადგებით”. ეს აღარ არის ხუმრობა, თუ “უწყინარი” პერფორმანსი. ეს არის ღმერთისა და ღვთისმშობლის გამოწვევა!!! მათ ენაზე რომ ვთქვათ – “ჩელენჯი”. სახიფათო და გამანადგურებელი მათთვის და გამოსაფხიზლებელი – ჩვენთვის!”- წერს დავით ქართველიშვილი სოციალურ ქსელში.