ხალხს სჭირდება შედეგი, ერთ წრეზე სიარული არ უნდა დავუშვათ, – ამის შესახებ საქართველოს ყოფილმა პრეზიდენტმა, მიხეილ სააკაშვილმა, დღევანდელ სასამართლო პროცესზე კლინიკა „ვივამედიდან“ დისტანციურად ჩართვისას განაცხადა. როგორც მან აღნიშნა, რეგიონებიდან ჩამოყვანილი ხალხი, ოპოზიციამ გამარჯვების გარეშე უკან არ უნდა გაუშვას. სააკაშვილმა მათ მოქმედების, შეტევისა და ზეწოლისკენ მოუწოდა. “თუ ხალხი ჩამოგვყავს რეგიონებიდან, მაგალითად, უკან არ უნდა გავუშვათ გამარჯვების გარეშე. თუ ძალიან ბევრ ხალხს ვკრებთ, ეს არ არის უბრალოდ ფონი განცხადებებისთვის, ეს არის იმისათვის, რომ ვიმოქმედოთ. მოქმედება, შეტევა, ზეწოლა, ბოლომდე კედელთან მიყუჟება, ხელი ჩავკიდოთ ერთმანეთს მთელ ქვეყანაში.” – განაცხადა მიხეილ სააკაშვილმა.