„ქართული ოცნების“ წევრის გია ცაგარეიშვილის განცხადებით, მოსაწონი და დასაფასებელი იქნება თუ რადიკალური ოპოზიცია საქართველოსთვის ევროკავშირის კანდიდატი ქვეყნის სტატუსის მინიჭებასთან დაკავშირებით მხარდამჭერ რეზოლუციას მიიღებს.
„ეს ადამიანები მიხვდნენ, რომ დროა, როგორმე გადალახონ ფობიები დაკავშირებული პირველ ოქტომბერთან, რადგან პირველი ოქტომბრის სინდრომი აქვთ შეყრილი და სახადი ვერ მოიშორეს.
როგორც ჩანს, ახლა დაფიქრდნენ, ცოტა ხნით წავუყრუებთ ამ სახადს, ქვეყანასაც მივხედავთ და ენის მოჩლექით სააკაშვილსაც ბოდიშს შევწირავთ, რომ ერთხელ მის წინააღმდეგ გავილაშქრეთ და საქართველო მხარეს დავდექით.
ეს გადაწყვეტილება არის უნიკალური შემთხვევა, ამ უკანასკნელი წლების მანძილზე ქვეყნისთვის მსახურების, როდესაც ოპოზიციური პარტიები სააკაშვილს კი არ ემსახურებიან, არამედ ქვეყანასა. სხვაგვარად, მოხარულები ვართ, რაც უფრო მეტი იქნება ამგვარი რეზოლუცია და აღარ იქნება მეტად ისეთი რეზოლუციები, როგორიც „ევროპის სახალხო პარტიას“ მიაღებინა ავაზაკთა, მოღალატეთა და კრიმინალთა პარტიამ („ნაციონალური მოძრაობას“ ვგულისხმობ) ეს რა თქმა უნდა, მოსაწონი და დასაფასებელი იქნება“, – განაცხადა ცაგარეიშვილმა.
ოპოზიციის რეზოლუციის პროექტი, რომელიც საქართველოსთვის ევროკავშირის კანდიდატი ქვეყნის სტატუსის მინიჭებას უჭერს მხარს, დუბლინში, „ალდეს“ კონფერენციაზე დაამტკიცეს.