მთავარი ჩვენი პარტნიორების მხრიდან უნდა იყოს ევროპული ღირებულებების ერთგულება, რაც EPP-ის შემთხვევაში ვერ ვიხილეთ, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ „ევროპის სახალხო პარტიის“ (EPP) განცხადებაზე საუბრისას განაცხადა.
მან ქვეყნისთვის ზურგში დანის ჩარტყმის მცდელობას შეადარა რადიკალური ოპოზიციის ქმედება და აღნიშნა, რომ „ამას მიჩვეული არიან“.
„შესაძლო შედეგებში, ისინი ყოველთვის შანსს ეძებენ. გახსოვთ, ვიზალიბერალიზაციას აპროტესტებდნენ. მთელი თვეების განმავლობაში, თუმცა მაშინ შედეგს ვერ მიაღწიეს. იმედი მაქვს, ისინი ვერც ამ შემთხვევაში მიაღწევენ შედეგს.
მათ მიერ გვერდზე იყო გადადებული ღირებულებები. ყველა ის დანაშაული, რომელიც „ნაცმოძრაობას“ აქვს ჩადენილი, რაც პირდაპირ უპირისპირდებოდა ევროპულ ღირებულებებს, ეს მეორეხარისხოვანია, ეს ჩანს ამ განცხადებიდან. მთავარია, საკუთარი წევრის დაცვა, რაც ვფიქრობ, სწორი მიდგომა არ არის. პირველ რიგში, ჩვენთვის ევროპა ღირებულებებია და არა რაღაც მდებარეობა, თუ სხვა რამ. შესაბამისად, მთავარი ჩვენი პარტნიორების მხრიდან უნდა იყოს ამ ღირებულებების ერთგულება, რაც ვერ ვიხილეთ EPP-ის შემთხვევაში, როდესაც ეს განცხადება გაკეთდა“, – განაცხადა კობახიძემ.
„ევროპის სახალხო პარტიამ“ განცხადება გამოაქვეყნა. EPP საქართველოში მიმდინარე პროცესებით შეშფოთებულია და, „ევროპის სახალხო პარტიის“ შეფასებით, მიხეილ სააკაშვილის მკურნალობაზე უარის თქმა და „მთავარი არხის“ გენერალური დირექტორის დაკავება დემოკრატიული ინსტიტუტების რღვევის ნათელი მაგალითებია.