„ხალხის ძალის“ წევრი დავით ქართველიშვილი „პრაიმ ტაიმის“ გავრცელებულ ინფორმაციას გამოეხმაურა, რომ სტრასბურგის სასამართლოში ე.წ. მდიდარი ენჯეოების საჩივარი, „გამჭვირვალობის კანონის“ გასაჩივრებასთან დაკავშირებით, ამ დრომდე არ გაგზავნილა.
როგორც ქართველიშვილი აღნიშნავს, დიდი ალბათობით მათი საჩივარი არც გაიგზავნება.
„რა თქმა უნდა იცრუეს. დიდი ალბათობით, არც გაიგზავნება. გუშინწინ არაჩვეულებრივ ახალგაზრდასთან მქონდა ხანგრძლივი საუბარი. მიცნობს, იცოდა ვინც ვიყავი. მეო, “რუსული კანონის” ერთ-ერთი მოწინააღმდეგე ვარო. მე კი “გამჭვირვალობის კანონის” ერთ-ერთი ინიციატორი ვარ მეთქი.
კონკრეტულად, რაშია მისი “რუსობა” – ვიკითხე. იმაშიო, რომ ეხლა თუნდაც უწყინარი იყოს, მომავალში შეიძლება ისეთი ჩანამატებით “დამძიმდეს”, როგორც ეს რუსეთში მოხდაო. და ჩვენს “რუსულ” სისხლის სამართლის კოდექსზე რას ფიქრობ მეთქი – ხომ არ გავაუქმოთ? და რატომ არისო ის “რუსულიო”. იმიტომ, რომ თავისი მუხლების 95%-ით რუსეთის სსკ-ს იდენტურია. თანაც რუსეთი პერიოდულად “ამძიმებს” მას სასჯელის გამკაცრების კუთხით და ჩვენთვისაც საამისოდ “მიმზიდველ” მაგალითს ხომ არ წარმოადგენს მეთქი…
დაუფიქრდა. სად ვმუშაობო, იცით – უცებ იკითხა. არა მეთქი. მან ერთ-ერთი ოპოზიციური ტელევიზია დამისახელა (არ მინდა დაკონკრეტება მისი “ამოცნობის” თავიდან აცილების გამო). იცითო – ასე მარტივად ჯერ არავის აუხსნია ჩემთვისო ჩვენი ამ საპროტესტო მოძრაობის მთელი “აბსურდულობა”.
კანონის მიღებიდან რამდენიმე თვე გავიდა, რომელიმე “ენ-ჯე-ო” ან ქვეყანა დაიღუპა, რამე ხომ არ გსმენია მეთქი ამაზე? არაო – სერიოზულად ჩაფიქრებულმა მიპასუხა და შემდგომი საუბრის დროს, იმდენ ფეიკ-აღქმას ავხადეთ ფარდა, შეხვედრით ორივე კმაყოფილები დავრჩით.
უნდა ვესაუბროთ ერთმანეთს. რაც შეიძლება მეტი. მათი მხრიდან ინფორმაციის გააზრება-გაანალიზების “პორტალი” ნაწილობრივ უკვე გახსნილია. ამიტომაც, არანაირი სარჩელი სტრასბურგში არ გაიგზავნება. დიდი ალბათობით – არა.“-წერს დავით ქართველიშვილი სოციალურ ქსელში.