„ხალხის ძალის“ წევრი, დავით ქართველიშვილი, ეხმიანება „პოს ტვ“-ის მიერ „ლელოს“ ლიდერის, მამუკა ხაზარაძისთვის დასმულ შეკითხვას იმის შესახებ, თუ რატომ მალავს იგი საკუთარ წარმომავლობას.
როგორც ქართველიშვილი აღნიშნავს, ქსენოფობიას მოწყვეტილ მართლმადიდებლურ სამყაროში წარმომავლობის არ რცხვენიათ, თუმცა, საპირისპიროდ ხდება, როდესაც ადამიანი ბუნებით სარწმუნოებისა და წარმომავლობის მიღმა იმყოფება.
„ბებიაჩემი, თავადის ქალი შუშანა ზედგინიძე მთელი თავისი ცხოვრება ამაყობდა, რომ წმინდა შუშანიკის სახელს ატარებდა. ქართველი ქალი – სომხური წარმომავლობის სახელით ამაყობდა. ასე ხდება ხოლმე ქსენოფობიას მოწყვეტილ მართლმადიდებლურ სამყაროში, სადაც თბილისის ერთ-ერთი განმანათლებელი – არაბია, მცხეთის – სპარსი, ხოლო წმინდა სიდონია და ძმები მისი, ლონგინოზი და ელიოზი – ებრაელები იყვნენ. მაგრამ, როდესაც ბუნებით სარწმუნოებისა და წარმომავლობის მიღმა იმყოფები, როდესაც არც ერთი გაგაჩნია, არც მეორე, ან ორივესი გრცხვენია – მაშინ რა თქმა უნდა “ვარსქენ არშუშას ძე ფეროზიანი” ხარ და ვახტანგ გორგასლის შთამომავლები მხოლოდ იმიტომ გეზიზღება და მათზე შურს იძიებ, რომ ამ სახელოვანმა მეფემ წმ. შუშანიკის მკვლელი თავის დროზე მოაკვლევინა…“, – წერს დავით ქართველიშვილი სოციალურ ქსელში.