„ეს ღია აღიარებაა იმისა, რომ არჩევნებამდე არჩევნებისთვის დაგეგმილი სცენარი რევოლუციაზე გადის და ოპოზიციურ სპექტრს, კოლექტიურ “ნაციონალურ მოძრაობას” ღია მხარდაჭერა აქვს ქუჩის რევოლუციური პროცესებისათვის,“- ასე ეხმიანება სოციალურ ქსელში „ხალხის ძალის“ წევრი თამთა მეგრელიშვილი ამერიკის შეერთებული შტატების სენატის საგარეო ურთიერთობების კომიტეტის თავმჯდომარის ბენ კარდინის განცხდებას, რომლის თქმითაც, ამერიკა მზად არის, რომ ქართველი ხალხის ევროპული არჩევანის დასაცავად კონკრეტული ნაბიჯები გადადგას.
მისივე თქმით, აღნიშნული სცენარისთვის გეგმა უკვე გაწერილია, არასამთავრობო, პოლიტიკურ თუ სამოქალაქო სექტორში როლები დანაწილებულია და სამიზნეს სწორედ 26 ოქტომბრის არჩევნები წარმოადგენს.
„ამერიკის შეერთებული შტატების სენატის საგარეო ურთიერთობების კომიტეტის თავმჯდომარე, ბენ კარდინი გამოცემა Globalnews.ge-თან ინტერვიუში საქართველოში არსებული გადამწყვეტი არჩევნების მნიშვნელობაზე საუბრობს და აცხადებს რომ ამერიკა მზად არის, რომ ქართველი ხალხის ევროპული არჩევანის დასაცავად კონკრეტული ნაბიჯები გადადგას.
ეს ღია აღიარებაა იმისა, რომ არჩევნებამდე არჩევნებისთვის დაგეგმილი სცენარი რევოლუციაზე გადის და ოპოზიციურ სპექტრს, კოლექტიურ “ნაციონალურ მოძრაობას” ღია მხარდაჭერა აქვს ქუჩის რევოლუციური პროცესებისათვის. ამ სცენარისთვის პოლიტიკური გეგმა გაწერილია, არასამთავრობო, პოლიტიკურ თუ სამოქალაქო სექტორში როლები დანაწილებულია და ცალსახად ცხადია, რომ დაუძინებელი მეგობრების სამიზნე 26 ოქტომბრის არჩევნებია.
არჩევნების დღესვე, შედეგების გამოცხადებამდე ოპოზიცია დაიწყებს რადიკალურ ქმედებებს, შეეცდება ცესკოს შენობის პიკეტირებას, გარეთ გამოიყვანს საგანგებოდ ამ პროცესისთვის გადამზადებულ ახალგაზრდებს და დაიწყებს საზოგადოებაში რევოლუციური მუხტის აწევას. ამაზე პოლიტიკური მხარდაჭერა კოლექტიურ “ნაციონალურ მოძრაობას” დასავლეთიდან აქვს და ამ პოზიციებს გაამყარებს ასევე რამდენიმე ევროპელი “მეგობარიც”.
რთული პროცესები გველის, მაგრამ ამომრჩეველთა უმრავლესობის პოლიტიკურ უარს “ნაციონალური მოძრაობის” ანტისახელმწიფოებრივ ქმედებებზე ვერცერთი დაგეგმილი სცენარი ვერ გადაფარავს და ვერ შეცვლის. 26 ოქტომბერს უმრავლესობის პოლიტიკური არჩევანის შედეგად “ქართული ოცნების” საარჩევნო შედეგი იქნება დასტური ქვეყანაში მშვიდობის მნიშვნელობაზე და ეს იქნება საზოგადოების დიდი ნაწილის ღია პოლიტიკური მზაობა, ეროვნული ღირსების განცდით, ჩვენი ფასეულობების დაცვით ვაკეთოთ საქმე და ჩვენი ევროპული მომავალი დავიცვათ,“ – წერს თამთა მეგრელიშვილი.