ოპოზიციის გაუქმება არ ხდება, ხდება კონკრეტული პიროვნებებისა და პარტიის გაწევა პოლიტიკური სცენიდან (ეს არის იდეა) იმისათვის, რომ გაჯანსაღდეს პოლიტიკური ველი, – განაცხადა კულტურის მინისტრმა თეა წულუკიანმა გადაცემა „იმედი LIVE“-ში.
თეა წულუკიანის თქმით, „ნაციონალური მოძრაობა“ არის ის ძალა, რომელიც სახელმწიფოსა და ქვეყანას განვითარების საშუალებას არ აძლევს.
„ქართული ოცნება“ არის ძალა, რომლებიც მათხოვრობის რეჟიმში ვითხოვდით, რომ ნუ გადაგვაგდებთ ლუკმად და მოგვეცით ის, რაც გვეკუთვნის. იმიტომ, რომ ჩვენ ვართ ბუნებრივად ევროპული სივრცისა და ოჯახის ნაწილი. „ქართულმა ოცნებამ“ ჩემნაირებისთვის არა, ახალგაზრდებისთვის მოიტანა უვიზო მიმოსვლის რეჟიმი. ჩვენ, როდესაც სწორედ ამით ვიყავით დაკავებული ბრიუსელში, პირადად მე, ჩემს კოლეგებთან ერთად ხელგამოწვდილი, ამ დროს გვიპირისპირდებოდნენ „ნაციონალური მოძრაობიდან“ გიორგი კანდელაკები, იქ ისხდნენ სხდომაზე და ამბობდნენ, ვციტირებ: ამ ქვეყანას არ მისცეთ უვიზო რეჟიმი სანამ ესენი არიან ხელისუფლებაში და ეს ნიშნავს იმას, რომ თუ ისინი არ არიან ხელისუფლებაში არაფერი სიკეთე არ უნდა მოხდეს. მაგრამ პრობლემა ისაა, რომ როდესაც ისინი ხელისუფლებაში არიან ბოროტებები ხდება – მათ სიკეთის ქმნა არ შეუძლიათ. სიკეთეს ვერ შექმნის ის ძალა, რომელიც ამბობს, რომ კიდევ კარგი ეს დაემართა გიგიაძეს, ახლა ერთით ნაკლები მხარდამჭერი და მებრძოლია „ქართულ ოცნებაში“, მაგრამ ჩვენ ბევრი ვართ და როცა ერთი გიგიაძე კვდება, იქ ათი გიგიაძეა, რომლებიც არ დაუშვებენ, რომ ამ პოლიტიკურმა ძალამ გააგრძელოს ქართული სახელმწიფოს ახალი თაობების ბედის გაუკუღმართება“, – აღნიშნა თეა წულუკიანმა.
წყალტუბოში, სოფელ გეგუთის მიკროშტაბში ოპოზიციის აქტივისტი, როლანდ ნუცუბიძე „ქართული ოცნების“ წევრებს მიუვარდა და მძიმე სიტყვიერი შეურაცხყოფა მიაყენა. ურთიერთშელაპარაკების დროს ნუცუბიძემ მმართველი პარტიის წევრს, ერმილე გიგიაძეს რამდენჯერმე შეაგინა.