IMG.GE IMG.GE

საქალაქო სასამართლოში ბადრი პატარკაციშვილის საქმის ერთ-ერთი ეპიზოდის განხილვა გრძელდება. დღევანდელ პროცესზე დაიკითხა საქმის გამომძიებელი, რომელმაც სატელეფონო ანძებიდან ბრალდებული ლევან ქარდავას მიერ განხორციელებული ზარების ამონაწერზე ისაუბრა.

პროკურორის თქმით მოწმემ დაადასტურა, რომ ქარდავას რამდენიმე სატელეფონო ნომერი ჰქონდა და განხორციელებული ზარები რამდენიმე რეგიონში ფიქსირდება. საქმისთვის კი მთავარი მოწმის ჩვენებაა, რომლის მიხედვითაც ქარდავა ურეკში იმყოფებოდა და უკანონო ბრძანებას გასცემდა.

დაცვის მხარე ბრალდების ვერსიას არ ეთანხმება და აღნიშნავს, რომ სატელეფონო ანძების ამონაწერის მიხედვით ქარდავა ურეკში არ იმყოფებოდა.

„ბრალდების მხარემ გამოვიკვლიეთ წერილობითი მტკიცებულებები, სადაც სრულადაა ასახული ჩვენ მიერ ჩატარებული გამოძიება და ასევე კონკრეტულად ამოღებული გვაქვს ჯემალ შამათავას ვითომდა ბრალდების საქმე, რაზეც მის მიმართ დადგა უკანონო განაჩენი. დღეს დაიკითხა გამომძიებელი, რომელმაც დეტალურად დაათვალიერა ინფორმაცია სატელეფონო ზარების და ასევე ანძების თაობაზე, რითაც დადგინდა კონკრეტულად სუბიექტების ადგილმდებარეობა. ჩვენ გვყავს კონკრეტული მოწმეები, რომლებიც ადასტურებენ რომ 2006 წლის 10 აგვისტოს ლევან ქარდავა იმყოფებოდა ურეკის ტერიტორიაზე და იძლეოდა იმ უკანონო დავალებებს, რომლის საფუძველზე საბოლოო ჯამში უკვე დააპატიმრეს ჯემალ შამათავა“, – განაცხადა პროკურორმა დავით გუმბერიძემ.

გამოძიების ინფორმაციით, ჯემალ შამათავას 2006 წელს დაუკავშირდნენ კუდ-ის ყოფილი მაღალჩინოსნები და აცნობეს, რომ ურეკში მდებარე ბადრი პატარკაციშვილის სახლიდან მოეხსნა დაცვა, რადგან დაშინების მიზნით უნდა მომხდარიყო ცეცხლსასროლი იარაღიდან გასროლა.

ჯემალ შამათავამ კი ამის შესახებ აცნობა ბადრი პატარკაციშვილის დაცვას. სწორედ ამის გამო ურეკის პოლიციის მაშინდელ ხელმძღვანელი წინა ხელისუფლების მაღალჩინოსნებმა უკანონოდ დააკავეს.

კომენტარის დატოვება
IMG.GE
გაზიარება