„უცხოეთის ხმამაღალი განცხადებებით გადიდგულებულმა რადიკალური ოპოზიციის წარმომადგენლებმა ამ დღეებში საბედისწერო შეცდომა დაუშვეს – საკუთარი თავი ბოლომდე გააშიშვლეს და ქართველ ხალხს ახალი სახელმწიფოებრივი მოწყობის იდეა შემოგვთავაზეს სარწმუნოების გარეშე“, – ამის შესახებ „ხალხის ძალის“ წევრი, ანალიტიკოსი თამარ ჩიბურდანიძე წერს. მისი თქმით, სწორედ ამიტომ იფეთქა საქართველოს მოსახლეობამ, რომელიც 29 აპრილს მთელი მსოფლიოს გასაგონად იტყვის ისტორიულ სიტყვას.
„დღეს საპროტესტო აქციას შვიდი ოპოზიციური პარტია უერთდებაო, აცხადებენ, თითქოს აქამდე ისინი ქუჩაში არ იდგნენ. ლიდერების გარდა, მთელი ამ ორი კვირის განმავლობაში, ახალგაზრდა თუ ასაკოვანი, თითქმის ყველანი ოპოზიციური პარტიების აქტივისტები იყვნენ. ლიდერები არ ჩანდნენ, რადგან სურდათ შეექმნათ სურათი, რომ რუსთაველზე საზოგადოება იდგა. ოპოზიციამ დაინახა, რომ უცხოური ფულით დაფინანსებულ მათ ენჯეოებს ავტორიტეტი არა აქვთ და კულისებიდან გამოვიდნენ, თუმცა ვერც მათი ავტორიტეტი აადუღებს ქუჩას. ქუჩაში რამდენიმედღიანი უშედეგო მოძრაობის შემდეგ, დღეს ოპოზიციური პარტიები საკუთარი ენჯეოებით ერთ ავანსცენაზე დადგნენ.
აღარ დარჩათ არც ერთი საერთაშორისო ტრიბუნა, საიდანაც საპროტესტო განცხადება არ გააკეთებინეს საკუთარ ლობისტებს, მაგრამ – უშედეგოდ, კანონის მიღების პროცესი გრძელდება. უცხოეთის ხმამაღალი განცხადებებით გადიდგულებულებმა ამ დღეებში საბედისწერო შეცდომა დაუშვეს – საკუთარი თავი ბოლომდე გააშიშვლეს და ქართველ ხალხს ახალი სახელმწიფოებრივი მოწყობის იდეა შემოგვთავაზეს სარწმუნოების გარეშე.
და აქ იფეთქა საქართველოს მოსახლეობამ, რომელიც 29 აპრილს მთელი მსოფლიოს გასაგონად იტყვის ისტორიულ სიტყვას. ხელმოცარული ოპოზიცია კი არჩევნების წინ დიდი იმედგაცრუებისთვის ემზადება. თუ გავითვალისწინებთ მათ მიერ დატრენინგებულ ახალგაზრდებს, ბუნებრივია, ყველანაირ ხერხს გამოიყენებენ არეულობისთვის – სწორედ ამისთვის გამოდიან ლიდერები ავანსცენაზე. ვნახოთ, რას შემოგვთავაზებენ, თუმცა, ფაქტია, რომ ხვალინდელ სასტიკ მარცხს უკვე შეგუებულნი არიან“, – წერს თამარ ჩიბურდანიძე.