„ხალხის ძალის“ წევრი თამთა მეგრელიშვილი აცხადებს, რომ რადიკალური ოპოზიციის და მისი მომხრეების მიზანია არჩევნების შედეგების გაყალბებულად გამოცხადება. როგორც მან ჟურნალისტებთან საუბრისას განაცხადა, ქართველი ამომრჩეველი გაიზარდა და ოპოზიციას ავიწყდება, რომ მათი ხმებით მანიპულირება შეუძლებელია.
სწორედ ამიტომ, როგორც მეგრელიშვილი ამბობს, 29 აპრილის აქციაზე მოსული ადამიანების სიმრავლე კიდევ ერთხელ დაადასტურებს ამომრჩევლის ნდობას „ქართული ოცნებისადმი“, რაც მის ლეგიტიმაციას გაზრდის.
„ოპოზიციური სპექტრის, განსაკუთრებით ნაციონალური მოძრაობის და მისი მეგობრების ევროპაში, თუ მის გარეთ, მთავარი ამოცანა დღეს არის ის, რომ არჩევნების შედეგი (ძალიან კარგად იციან მათ რა შედეგიც დადგება) არ იყოს გაზიარებული და მიღებული. ქართული საზოგადოება, რომელიც 29 აპრილის აქციაზეც მივა, აჩვენებს, რომ მხარს უჭერს „ქართულ ოცნებას“, რომელსაც ძალიან მაღალი ლეგიტიმაცია და ნდობის მანდატი ექნება.
ეს გამოსვლა ჩვენს ძალებს გაამყარებს, რათა ადვილად არ მოხდეს იმ გეგმის შესრულება, რაც რადიკალებს აქვთ. ამ გეგმის ნაწილია მაგალითად ის, რომ გამჭვირვალობის შესახებ კანონპროექტს უპირისპირდებიან, ლგბტ პროპაგანდას ემხრობიან და ა.შ. ამ ადამიანებს ავიწყდებათ, რომ ქართველი ამომრჩეველი გაიზარდა, აღარ არის 2003 წელი, როცა სხვა მუხტით ვიყავით დამუხტულები, მაგრამ შევცდით და რეფორმების სახელით მივიღეთ მკვლელი რეჟიმი, რომელმაც სისხლიანი 9 წელი შემოგვთავაზა და ქართველი კაცი გაგვიუპატიურა, სხვა რომ არაფერი ვთქვათ,“ – განაცხადა თამთა მეგრელიშვილმა.