პარტია „ხალხის ძალის“ თავმჯდომარე სოზარ სუბარი სოციალურ ქსელში ეხმიანება ამერიკის სახელმწიფო დეპარტამენტის პრეს-სპიკერის, მეთიუ მილერის განცხადებას ქართველ მოსამართლეებთან დაკავშირებით, რომ საქართველომ ისინი უნდა დასაჯოს.
სოზარ სუბარი აცხადებს, რომ მიუხედავად ხელისუფლების არაერთი მოთხოვნისა, ამერიკულმა მხარემ ვერ წარმოადგინა ვერც ერთი მტკიცებულება ამ მოსამართლეების რაიმე სახის დანაშაულისა, რის გამოც მოხდა მათ სანქცირება. ამასთან, თვალსაჩინოებისთვის სოზარ სუბარი აქვეყნებს ქართული და ამერიკული სასამართლოს ნდობის რეიტინგებს.
„გუშინ ღამით, სახელმწიფო დეპარტამენტიდან მორიგი დაუსაბუთებელი და შეურაცხმყოფელი ბრალდებები გაჟღერდა ჩვენი ქვეყნის მიმართ. პრეს-სპიკერმა, მეთიუ მილერმა ყოველგვარი არგუმენტების გარეშე, როგორც პატრონმა მონას, ვასალმა ყმას, სწორედ ამ ტონალობაში მოგვიწოდა დავიჭიროთ და დავსაჯოთ ქართველი მოსამართლეები, რომელთა დანაშაულის ან რაიმე კანონსაწინააღმდეგო ქმედების შესახებ მტკიცებულებების წარმოდგენაზე უარს გვეუბნებიან, რადგან ასეთი მტკიცებულება უბრალოდ არა აქვთ.
ჩვენ არაერთხელ მოვითხოვეთ დასანქცირებული მოსამართლეების შესახებ დეტალური ინფორმაცია, თუმცა წინა ელჩმა, კელი დეგნანმა ამრეზით გვიპასუხა – ინფორმაცია ღია წყაროებში მოიძიეთო. ეს არაავთენტური, მაგრამ კოორდინირებული შეტევა ქართულ სასამართლოზე გრძელდება, თუმცა პატივცემულ მილერს და ქართული სასამართლოს „დაუძინებელ მეგობრებს“ ავიწყდებათ, რომ მათ ქვეყანაში ამ ინსტიტუციის მიმართ ნდობა მინიმალურია, რასაც მათ მიერ ჩატარებული კვლევები ადასტურებს. ამ ფონზე, ქართული სასამართლო ნაბიჯ-ნაბიჯ წინ მიიწევს და 2012 წლის შემდეგ სიტუაცია რადიკალურად გაჯანსაღებულია. ამ ყველაფერმა ერთი ქართული გამონათქვამი გამახსენა – „სამწუხაროდ არსებობენ ადამიანები, რომლებიც სხვის თვალში ბეწვს ამჩნევენ, ხოლო საკუთარ თვალში დირეს ვერ ხედავენ“… -წერს სოზარ სუბარი სოციალურ ქსელში.
უსასტიკესი ფორმით მიმდინარეობს ფსიქოლოგიური ტერორი – ხათუნა ხოფერია