„რასაც უწინასწარმეტყველებდნენ „ქართული ოცნების“ ლიდერებს ახლა, თავად ოპოზიციის ერთ-ერთ დამფინანსებელს დაემართა – დასანქიცრდა შეერთებული შტატების მხრიდან“, – ამის შესახებ „ხალხის ძალის“ ერთ-ერთმა ლიდერმა გურამ მაჭარაშვილმა მედიასთან განაცხადა. მისი თქმით, საქართველოს ოპოზიციის წარმომადგენლების მინიმუმ 95%-ი ფინანსდება უცხოური ფულით.
„სამართალი, მართალია ურმით დადის, მაგრამ მაინც დადის, ყველას დაეწევა სამართლიანობა და სამართლის აღსრულების ვალდებულება, მათ შორის ადეიშვილსაც დაეწევა და კეზერაშვილსაც თითქმის უკვე დაეწია.
მისი გარემოცვის არაერთი წევრი არის დაკავებული და მასაც კარგი დღე არ უჩანს იმიტომ, რომ რასაც უწინასწარმეტყველებდნენ „ქართული ოცნების“ ლიდერებს ახლა, თვითონ ოპოზიციის ერთ-ერთი დამფინანსებელი დასანქიცრდა შეერთებული შტატების მხრიდან. საერთაშორისო სააგენტომ კი თქვა, რომ ის არის თაღლითი, მისტერ ოფშორ-კეზერაშვილი და ა.შ. სააკაშვილსაც ეგონა, რომ ვერ დაეწეოდა სამართალი, ვაგონში შეძვრა, მაგრამ იქაც მიაგნო სამართალმა.
ასე რომ, კეზერაშვილი კიდევ უფრო მალე მოხვდება იმ სამართლებრივ სივრცეში, რომელიც აიძულებს პასუხი აგოს არა მხოლოდ იმაზე, რაც საქართველოში ჩაიდინა, როგორც ჩანს ევროპაშიც ძალიან ბევრი დანაშაული ჩაუდენია. სამწუხაროდ, საქართველოს ოპოზიციის მინიმუმ 95%-ი ფინანსდება უცხოური ფულით, მათ შორის, კეზერაშვილის ფულით, რომელიც მან ჯარს წაართვა. ჩვენ უკვე ამ ღია პოლიტიკაში ვართ და საზოგადოებამ ყველაფერი უნდა იცოდეს, ვის ირჩევს, ვინ ეყოლება მთავრობაში. საზოგადოებამ უნდა იცოდეს, ვინ ვინ არის ქართულ პოლიტიკურ სივრცეში“, – განაცხადა მაჭარაშვილმა.