იენს სტოლტენბერგი აშშ-ის ყოფილი პრეზიდენტის, დონალდ ტრამპის განცხადებას გამოეხმაურა, რომელმაც აღნიშნა, რომ რუსეთს ნატოს იმ ქვეყნებზე თავდასხმისკენ წაახალისებდა, რომლებიც გადასახადებს არ გადაიხდიდნენ. ამის შესახებ The Guardian-ი წერს.
გამოცემის ინფორმაციით, ნატოს გენერალურმა მდივანმა განაცხადა, რომ ნებისმიერ თავდასხმას ალიანსზე „ერთიანი და ძლიერი პასუხი“ მოჰყვება.
„ნებისმიერი ვარაუდი, რომ მოკავშირეები ერთმანეთს არ დაიცავენ, ძირს უთხრის მთელ ჩვენს უსაფრთხოებას, მათ შორის აშშ-ის და მზარდი რისკის ქვეშ აყენებს ამერიკელ და ევროპელ ჯარისკაცებს. ველი, რომ მიუხედავად იმისა თუ ვინ გაიმარჯვებს საპრეზიდენტო არჩევნებში, აშშ ნატოს ძლიერ და ერთგულ მოკავშირედ დარჩება“, – აღნიშნულია სტოლტენბერგის განცხადებაში.
მისივე თქმით, ნატო საკუთარი მოკავშირეების დასაცავად მზად არის და ამის ძალა აქვს.
დონალდ ტრამპის განცხადებით, ის წაახალისებდა რუსეთს, რომ თავს დასხმოდა ნატოს ნებისმიერ წევრს, რომელიც არ გადაიხდიდა გადასახადებს, როგორც სამხედრო ალიანსის ნაწილი.