IMG.GE IMG.GE

საქართველოს მთავრობის ადმინისტრაციაში გამყოფი ხაზის მიმდებარე სოფლებში დაზარალებული მოსახლეობის საჭიროებებზე რეაგირების დროებითი სამთავრობო კომისიის მორიგი სხდომა გაიმართა.

სხდომას ვიცე-პრემიერი, რეგიონული განვითარებისა და ინფრასტრუქტურის მინისტრი მაია ცქიტიშვილი და შერიგებისა და სამოქალაქო თანასწორობის საკითხებში სახელმწიფო მინისტრი თეა ახვლედიანი უძღვებოდნენ.

„გამყოფი ხაზის მიმდებარედ 116 სოფელია, სადაც დაახლოებით 50 000 ადამიანი ცხოვრობს. ყველა სამთავრობო უწყების ამოცანაა, მაქსიმალურად შევუმსუბუქოთ მათ ცხოვრების პირობები. წელს მივიღეთ საკანონმდებლო ცვლილება, რომლის ფარგლებში საოკუპაციო ხაზზე 19 სოფელს მიენიჭა მაღალმთიანი დასახლების სტატუსი. ეს ნიშნავს, რომ კიდევ 14 000 ადამიანს ექნება საშუალება ამ სტატუსის ფარგლებში არსებული შეღავათებითაც ისარგებლოს, ეს არის 20%-ით მეტი პენსია, მასწავლებლებისთვის შესაბამისი დანამატები და ბევრი სხვა სოციალური და ეკონომიკური კომპონენტი. ასევე ვაგრძელებთ ამ სოფლების ინფრასტრუქტურულ განვითარებასაც. სხვადასხვა პროფილის სამუშაოებზე 2013 წლის შემდეგ 160 მლნ ლარზე მეტი მიიმართა და რა თქმა უნდა, ეს პროცესი დღესაც აქტიურად გრძელდება,“ – აღნიშნა მაია ცქიტიშვილმა.

რეგიონული განვითარებისა და ინფრასტრუქტურის მინისტრმა მნიშვნელობის თვალსაზრისით გამოყო 26 სოფლის წყლის ინფრასტრუქტურის სამუშაოები, რომლის დასრულების შემდეგაც დაახლოებით 20 ათას ადამიანს ექნება წვდომა 24-საათიან წყალმომარაგებაზე.

„რაც შეეხება სასწავლო დაწესებულებებს, სკოლების რეაბილიტაციის პროექტის ფარგლებში უკვე შეკეთდა 30 – ზე მეტი სკოლა. ძალიან სასიხარულოა, რომ წელს დასრულდება ერთი და მომავალ წელს კიდევ სამი ახალი სკოლის მშენებლობა. კომისიის ფორმატში განსახილველ საკითხებში მნიშვნელოვანი კომპონენტია გამყოფი ხაზის სოფლებში მცხოვრები სტუდენტების უმაღლეს სასწავლებლებში სწავლის დაფინანსება. მთლიანობაში 7900 სტუდენტზე მეტია დაფინანსებული 2013 წლის შემდეგ და რა თქმა უნდა, შევთანხმდით, რომ ეს პროგრამა 2020-2021 სასწავლო წლებშიც გაგრძელდება,“ – აღნიშნა მაია ცქიტიშვილმა.

კომენტარის დატოვება
IMG.GE