„გერმანიაში სამკურნალოდ, სასწავლებლად და სამუშაოდ ჩასული საქართველოს მოქალაქეები სავალდებულო კარანტინს არ გაივლიან“, – ამის შესახებ ეკონომიკის მინისტრმა, ნათია თურნავამ მთავრობის ადმინისტრაციაში გამართულ ბრიფინგზე განაცხადა.
„გერმანიამ მიიღო გადაწყვეტილება, საქართველოს მოქალაქეთა გარკვეული კატეგორიისთვის სავალდებულო კარანტინის გაუქმების შესახებ. ეს ეხება სამკურნალოდ, სასწავლებლად და სამუშაოდ ჩასულ მოქალაქეებს. დანარჩენში ველოდებით, რა გადაწყვეტილებას მიიღებს ევროკავშირი. რაც შეეხება რეგულარულ ფრენებს, მთავარია, დავინახოთ, რომ ამა თუ იმ ქვეყანასთან საზღვრის გახსნა უსაფრთხოა ჩვენთვის. მსოფლიოში ძალიან მძიმე ეკონომიკური მდგომარეობაა. სავალუტო ფონდის განახლებული პროგნოზით, მოსალოდნელია გლობალური ეკონომიკის სულ მცირე 4,9%-ით დაცემა, მათ შორის 10%-მდე არის პროგნოზი ევროპასთან მიმართებაში და ეს არ შეიძლება არ აისახოს საქართველოზეც. არ გამოვრიცხავ, რომ კონკრეტული კომპანიების მდგომარეობა გაუარესდეს და სწორედ ამის წინააღმდეგაა მიმართული ჩვენი ანტიკრიზისული გეგმა. თუმცა რომელიმე კომპანია შეიძლება მაშინაც გაკოტრდეს, როდესაც ეკონომიკა ყვავის, მაგრამ ამ კომპანიას რაღაც გადაულახავი პრობლემები შეექმნას. ამიტომ შეიძლება თუ არა რომელიმე კომპანიის გაკოტრების კორონავირუსის პანდემიასთან დაკავშირება, ეს თითოეულ კონკრეტულ შემთხვევაში ცალკეული განხილვის საგანი უნდა იყოს“, – განაცხადა თურნავამ.
გამტაცებელმა ბოლო მძევლებიც გაათავისუფლა და მიიმალა