“დავაკვირდები პროცესს, რა თქმა უნდა, ვიქნები საქართველოში, მაგრამ რას ვიზამ და როგორ მოვიქცევი, ეს იქნება განპირობებული იმით, როგორ განვითარდება ქვეყანაში პოლიტიკური მოვლენები.”– განაცხადა ნინო ბურჯანაძემ 20 ოქტომბერს, ტელეკომპანია “პირველი”-ს ეთერში სტუმრობისას, როდესაც უპასუხა დიანა ტრაპაიძის კითხვას, თუ რას აპირებს და სად იქნება ის 2024 წლის საპარლამენტო არჩევნებზე.
ნინო ბურჯანაძის თქმით, ის დააკვირდება პროცესებს, თუმცა ხაზგასმით აღნიშნავს, რომ მას არ უღირს 3 ან 5 ადამიანით პარლამენტში შესვლა, თუ არ შეეძლება გადაწყვეტილებების მიღება და არ ექნება გავლენები პოლიტიკურ პროცესებზე.
“მარტო მე, რაც არ უნდა ვიმოქმედო და ბრძნული აზრები ვთქვა, ბუნებრივია, რეალობა ვერ შეიცვლება. თუ დავინახავ, რომ პოლიტიკური მხარეები წარმართავენ პროცესს ისე, რომ ქვეყანაში რეალობა შეიცვალოს, რა თქმა უნდა, მე ამაში ძალიან აქტიურ მონაწილეობას მივიღებ, მაგრამ იმისთვის, რომ 1, 2 ან 5 კაცი შევიყვანო პარლამენტში, სიმართლე გითხრათ, ამისთვის არ მიღირს ბრძოლა იმიტომ, რომ მე პარლამენტის თავმჯდომარის თანამდებობიდან წამოვედი, რადგან აზრი არ ჰქონდა, გავლენა ვერ მექნებოდა, რაც სწორად მიმაჩნდა იმას ვერ გავაკეთებდი და ახლა, 4 და 5 კაცით პარლამენტში შესვლისთვის იმიტომ, რომ ასეთ სპექტაკლებში მივიღო მონაწილეობა, რასაც ბოლო 2 თვე ვხედავდი, ამისთვის თავის შეწუხება ნადმვილად არ მიღირს”- განაცხადა ნინო ბურჯანაძემ.