„ამ ისტორიული ფაქტის შემდეგ ოპოზიცია განწირული ხმით გაჰკივის. მესმის და შევდივარ მათ მდგომარეობაში, თუ რამდენად მძიმეა ამის შეგუება მათთვისაც და მათი ლობისტებისთვისაც“, – ამის შესახებ „ხალხის ძალის“ წევრმა, თამარ ჩიბურდანიძემ, სოციალურ ქსელში დაწერა.
მისი თქმით, საქართველო-ჩინეთს შორის პარტნიორული ურთიერთობა ისტორიული მოვლენაა და რადიკალური ოპოზიცია ტრადიციულად ნეგატიურადაა განწყობილი ქვეყნის სასიკეთოდ მომხდარი ცვლილებების მიმართ.
„საქართველოს დელეგაციის ვიზიტი ჩინეთში პრემიერ-მინისტრის ხელმძღვანელობით დასრულდა. გაფორმდა სტრატეგიული თანამშრომლობის დოკუმენტი, რომელიც გულისხმობს ოთხ მიმართულებას: პოლიტიკურს, ეკონომიკურს, კულტურულს და საერთაშორისოს. ეს არის უდიდესი მიღწევა დღევანდელი ხელისუფლების. მაშინ, როდესაც დღეს თავად ევროპული სახელმწიფოები მიისწრაფვიან ჩინეთთან სათანამშრომლოდ და ბევრი ამას ვერ ახერხებს, ბატონ ირაკლი ღარიბაშვილს უმაღლესი დონის შეხვედრები გაუმართეს და საქართველომ მიიღო სტრატეგიული თანამშრომლობის დოკუმენტი. ვინც ოდნავ მაინც აზროვნებს და იცის, რისი წინაპირობაა ეს დოკუმენტი, მიხვდება, რომ საქართველოში გარდაუვალი აღმავლობის ხანა იწყება. ამ ისტორიული ფაქტის შემდეგ ოპოზიცია განწირული ხმით გაჰკივის. მესმის და შევდივარ მათ მდგომარეობაში, თუ რამდენად მძიმეა ამის შეგუება მათთვისაც და მათი ლობისტებისთვისაც. ერთი რამ ფაქტია – სტრატეგიული თანამშრომლობა ნიშნავს იმას, რომ ქვეყანას ეკონომიკურ გაძლიერებაში ეხმარები. არა მხოლოდ იმათ, ვინც საერთაშორისო გრანტებშია ჩართული, არამედ, ყველას. ქვეყნის ეკონომიკური წინსვლა ყველა მოქალაქეზე უნდა აისახებოდეს. ჩინეთში საქართველოს ხელისუფლების ისტორიული ვიზიტი სწორედ ამის დასაწყისია“, – წერს თამარ ჩიბურდანიძე.