კულტურის სამინისტროს განცხადება ნიჭიერთა ათწლედის ყოფილი ხელმძღვანელის ბრალდებებზე

514
წაკითხვა/ნახვა
IMG.GE

საქართველოს კულტურის, სპორტისა და ახალგაზრდობის სამინისტრო ეხმიანება ზაქარია ფალიაშვილის სახელობის ცენტრალური სამუსიკო სკოლის – “ნიჭიერთა ათწლედის” ყოფილი ხელმძღვანელის თამარ შენგელიას მიერ სოციალური ქსელის მეშვეობით გავრცელებულ ინფორმაციას იმასთან დაკავშირებით, თითქოს „მისი და ნიკა რურუას ძალისხმევით ნიჭიერთა ათწლედისათვის გადაცემული შენობა სასწავლებელს ჩამოართვეს

უწყების განცხადებით, თამარ შენგელიამ ცრუ ინფორმაცია გაავრცელა და ის სასწავლებელს 2013 წლის ივნისამდე ხელმძღვანელობდა.

“სინამდვილეში კი, იმ შენობაში, რომელზეც სასწავლებლის ყოფილი ხელმძღვანელი „წუხს“, ნიჭიერთა ათწლედს ერთი დღეც კი არ უმუშავია. ჩხეიძის ქ. N8-ში მდებარე შენობა სასწავლებელს 2012 წლის აგვისტოში გადაეცა. თუმცა, სწორედ სასწავლებლის მაშინდელი დირექტორის – თამარ შენგელიასა და კულტურის სამინისტროს უყურადღებობის გამო, შენობაში 2012 წლის 2 ოქტომბერს თვითნებურად შეიჭრნენ იძულებით გადაადგილებული პირები (80-მდე ოჯახი). როგორც ცნობილია, ქართული ოცნების მთავრობის შემადგენლობა მხოლოდ 25 ოქტომბერს იქნა დამტკიცებული. ამ თარიღამდე კი შენობის დაცვა და მოვლა-პატრონობა სწორედ ქალბატონ თამარ შენგელიას ევალებოდა.

ამის ნაცვლად, სასწავლებლის ხელმძღვანელობა ცრუ დაპირებებს აძლევდა აღსაზრდელებს, თითქოს ისინი უახლოეს პერიოდში შეძლებდნენ შენობაში შესვლასა და სწავლას. რეალურად კი ეს შეუძლებელი იყო, ვინაიდან შენობაში 80 ოჯახი ცხოვრობდა. ამასთან, სასწავლებლისთვის გადაცემული შენობა სრულ რეაბილიტაციას საჭიროებდა, რისთვისაც რამდენიმე მილიონი ლარი იყო საჭირო. ცხადია, ეს სასწავლებლის მაშინდელმა ხელმძღვანელობამაც იცოდა, მაგრამ ისინი დაპირებებით კვებავდნენ აღსაზრდელებს.

ყოველივე ზემომოყვანილიდან ნათელია, რომ თამარ შენგელიას მიერ სოციალურ ქსელში გავრცელებული ინფორმაცია არის საზოგადოების შეცდომაში შეყვანის მცდელობა, ვინაიდან ქალბატონ თამარს კარგად მოეხსენება, რომ შენობაში, მისივე დაუდევრობის გამო, აღსაზრდელებს რეალურად არასდროს უსწავლიათ.

კულტურის ახლადშექმნილ სამინისტროს მიაჩნია, რომ რაკი არ არსებობს ქალბატონი თამარ შენგელიას ხელმძღვანელობისას შენობაში შეჭრილი 80-მდე ოჯახის განსახლების გეგმა, სამინისტროს არ აქვს უფლება, ცრუ დაპირებები მისცეს მოსწავლეებს. კულტურის სამინისტრომ გადაწყვიტა, რომ შენობა, რომელშიც რამდენიმე ათეული ოჯახი ცხოვრობს, დაუბრუნდეს სახელმწიფოს, როგორც ნიჭიერთა ათწლედისათვის გამოუსადეგარი და აღსაზრდელებისთვის გამოიძებნოს სხვა, თავისუფალი შენობა.

აქვე საზოგადოებას შევახსენებთ, რომ ქალბატონი თამარ შენგელიასათვის საქებარი წინა ხელისუფლების პერიოდში, 2006 წელს, ნიჭიერთა ათწლედს ჩამოერთვა მის საკუთრებაში არსებული შენობა თბილისში, ზუბალაშვილის ქ. N42-ში, რომელიც გასხვისდა. სწორედ ამის შემდეგ დარჩა სასწავლებელი შენობის გარეშე და სამუსიკო სახელოვნებო განათლება დაყენებულ იქნა რეალური საფრთხის წინაშე.

ამჟამად, საქართველოს კულტურის სამინისტროს მიზანს ამ მრავალწლიანი პრობლემის 2021 წლის ბოლომდე გადაჭრა წარმოადგენს, რაც დიდი გამოწვევაა.”- ნათქვამია კულტურის სამინისტროს საპასუხო განცხადებაში.

კომენტარები
რეკლამა ____________ IMG.GE
მოწონება