მას წარმოდგენა არ აქვს, რა არის ევროპული ღირებულებები, იმიტომ რომ ევროპული ღირებულებები არის ადამიანის უფლებები, კანონის უზენაესობა და ზუსტად ამის გამოა, რომ მიხეილ სააკაშვილი სასჯელს იხდის, – ასე შეაფასა ირაკლი ჩიქოვანმა ლევან ხაბეიშვილის განცხადება, რომელმაც ხელისუფლებას სააკაშვილისა და გვარამიას გათავისუფლება მოსთხოვა. საპარლამენტო უმრავლესობის წევრმა „ნაციონალური მოძრაობის“ აქციაზეც ისაუბრა, რომელიც 9 აპრილს უნდა გაიმართოს.
„დიდი მოლოდინები ამ აქციასთან დაკავშირებით არ მაქვს, ვინაიდან ეს აქცია დაფინანსებულია კეზერაშვილის მიერ, იდეოლოგია არის ვანო მერაბიშვილის და ხელმძღვანელობს კომიკოსი ხაბეიშვილი“, – განაცხადა ჩიქოვანმა.
„ნაცმოძრაობის“ თავმჯდომარემ ლევან ხაბეიშვილმა კანდიდატის სტატუსის მისაღებად, ხელისუფლებას სააკაშვილისა და გვარამიას გათავისუფლება მოსთხოვა, 9 აპრილს კი რუსთაველის გამზირზე აქცია დააანონსა.