მთელი პოლიტიკური სპექტრი არის დღეს წარმოდგენილი ხალხის სახელით უკრაინასა და სხვადასხვა ქალაქში, მინუს „ნაციონალური მოძრაობისა“, – ამის შესახებ „იმედს“ განუცხადა საპარლამენტო უმრავლესობის წევრმა, ბექა ოდიშარიამ, რომელიც უკრაინაში პარლამენტის თავმჯდომარის დელეგაციაში იმყოფება.
„ეს არის მათი გადაწყვეტილება და ეს არის ის, რასაც მთელი მათი მოღვაწეობის განმავლობაში აკეთებენ საქართველოს წინააღმდეგ – საქართველო და მინუს „ნაციონალური მოძრაობა“, – განაცხადა ბექა ოდიშარიამ.
ამასთან, დეპუტატმა აღნიშნა, რომ ძნელია, უემოციოდ უყურო, რაც ხდება უკრაინის ქალაქებში.
„ძნელია უემოციოდ დატოვო ის, რაც ჩვენ ჩვენი თვალით ვნახეთ – ერთგან 60 ადამიანის, ერთგან 50 თვალახვეული, ხელებშეკრული ნაწამები ადამიანის სამარხი. მუშაობენ ფრანგი ჟანდარმები, უკრაინის კრიმინალური პოლიცია, შესაბამისი სტრუქტურები. ეს საოცარი, ლამაზი დაბა მიწასთან არის გასწორებული“, – განაცხადა ბექა ოდიშარიამ.
საქართველოს პარლამენტის თავმჯდომარის, შალვა პაპუაშვილის დელეგაციაში შედიან ვიცე-სპიკერები – არჩილ თალაკვაძე, დავით სერგეენკო, ლევან იოსელიანი, საპარლამენტო უმრავლესობის წევრი, ბექა ოდიშარია, ასევე სხვადასხვა პოლიტიკური ჯგუფების დეპუტატები: ანა ნაცვლიშვილი, ვახტანგ მეგრელიშვილი, ხათუნა სამნიძე და გიორგი ხოჯევანიშვილი.