IMG.GE IMG.GE ___________________________________ IMG.GE

ეს კიდევ ერთი სერიოზული გზავნილია, რაც გვაახლოებს ევროკავშირთან საბოლოო მიზანთან, რაც არის გაწევრიანება, – ამის შესახებ საქართველოს საგარეო საქმეთა მინისტრმა, დავით ზალკალიანმა განაცხადა. საუბარია “აღმოსავლეთ პარტნიორობის“ შესახებ რეზოლუციაზე, რომელიც ევროპარლამენტმა დღეს დაამტკიცა.

პირველ რიგში, ეს არის ჩვენი ევროპული მისწრაფების და ევროპული არჩევანის აღიარება. მეორე, რომ საქართველოს მოლოდინი, სწრაფად მოხდეს მისი ინტეგრაცია საერთო ევროპულ ბაზარში, არის ასევე ასახული ამ დოკუმენტში. მესამე მიმართულება – ჩვენი პრიორიტეტი და დამოკიდებულება პრინციპისადმი – „მეტი მეტისთვის“, ანუ დიფერენცირებული და ყოვლისმომცველი მიდგომა, ესეც ასახულია დოკუმენტში.

ევროკავშირი აღიარებს პრინციპს, როდესაც პარტნიორი ქვეყანა აკეთებს მეტს ინტეგრაციული პროცესების მიმართულებით, ის უფრო მეტს იმსახურებს. ჩვენ ამ მიმართულებით ასევე გვაქვს ხელშესახები შედეგები. კერძოდ, პანდემიასთან ბრძოლის კუთხით საქართველოს მიმართ ევროკავშირის მხარდაჭერა იყო ძალიან სერიოზული და ხელშესახები. ეს ითარგმნა არა მხოლოდ დეკლარაციაში, არამედ – პრაქტიკულ განზომილებაში.

მეოთხე და მთავარი მიმართულება – უსაფრთხოების კუთხით ევროკავშირთან თანამშრომლობაა. ჩვენს ოკუპირებულ ტერიტორიებზე არსებული სიტუაციის მიუღებლობა და რუსეთისთვის, როგორც აგრესიის განმახორციელებელი ქვეყნის მიმართ შეფასებები კიდევ ერთი დასტურია იმისა, რომ ჩვენ, ჩვენი ევროპელი პარტნიორების მხრიდან გვაქვს სრული გაგება. ეს დოკუმენტი მართლაც ასახავს ჩვენს საერთო მისწრაფებებს და პრიორიტეტებს. ეს კიდევ ერთი სერიოზული გზავნილია, რაც გვაახლოებს ევროკავშირთან საბოლოო მიზანთან, რაც არის გაწევრიანება“, – განაცხადა ზალკალიანმა.

ცნობისთვის, ევროპარლამენტმა “აღმოსავლეთ პარტნიორობის” შესახებ რეზოლუცია დაამტკიცა – ევროპელი დეპუტატები ევროკავშირის საბჭოს მოუწოდებენ, რომ საქართველოს, მოლდოვასა და უკრაინას თანამშრომლობის გაფართოებული სტრატეგია შესთავაზოს. დოკუმენტს მხარი 507-მა დეპუტატმა დაუჭირა, წინააღმდეგი იყო – 119 ევროპარლამენტარი.

კომენტარის დატოვება
IMG.GE
გაზიარება