IMG.GE ___________________________________ IMG.GE

საქართველოს პრემიერ-მინისტრი გიორგი გახარია, მთავრობის წევრებთან ერთად ამბროლაურში, კოოპერატივში – „რაჭის ნატურალური პროდუქტები” იმყოფებოდა, რომელიც 11 მეწარმეს აერთიანებს.

კოოპერატივის გამგეობის თავმჯდომარემ, ლაშა გაგოშიძემ აღმასრულებელი ხელისუფლების წევრებს განუცხადა, რომ საწარმოში მუდმივად დასაქმებულია 4 ადამიანი, ხოლო სეზონურად -კიდევ რამდენიმე ემატება. კოოპერატივს 300 ძირი ფუტკარი ჰყავს და საწარმოს წარმოების წლიური მოცულობა კი 6 ტონა თაფლს შეადგენს.

კოოპერატივის გამგეობის თავმჯდომარის ცნობითვე, 2018 წელს ექსპორტზე 1.2 ტონა თაფლი გაიტანეს, ამჟამად კი მარაგშია 5 ტონა, რომლის ექსპორტი პანდემიის გამო დროებით შეფერხდა.

პრემიერ-მინისტრმა აღნიშნა, რომ ნატურალური თაფლის წარმოების განვითარება მნიშვნელოვანია და მათ შორის სწორედ ნატურალური წარმოების განვითარების ხელშეწყობას ისახავს მიზნად ის სახელმწიფო პროგრამები, რომლებსაც სახელმწიფო ფერმერებს დღეიდან უკვე ერთ სივრცეში, მათ საცხოვრებელ ადგილზე სთავაზობს. გიორგი გახარიას განცხადებით, ახალი პროგრამა – „სახელმწიფო – შენი პარტნიორი“ არის პრაქტიკული მექანიზმი, რომელიც მეწარმეებს, ფერმერებს აძლევს შესაძლებლობას, ერთ სივრცეში, ადგილზე მიიღონ მომსახურება, რისთვისაც დღემდე თბილისში ჩასვლა სჭირდებოდათ.

კოოპერატივში პრემიერ-მინისტრი ვიცე-პრემიერთან, იუსტიციის მინისტრ თეა წულუკიანთან, ეკონომიკისა და მდგრადი განვითარების მინისტრ ნათია თურნავასა და გარემოს დაცვისა და სოფლის მეურნეობის მინისტრ ლევან დავითაშვილთან ერთად იმყოფებოდა.

კომენტარის დატოვება
IMG.GE
გაზიარება