მათი გასვლით არც არაფერი მიემატება პარლამენტს და არც დააკლდება – მათი თვითმიზანია, ხელი შეუშალონ ევრორეკომენდაციების პირველივე პუნქტის შესრულებას,- ამის შესახებ პარტია “ქართული ოცნების” თავმჯდომარე ირაკლი კობახიძემ ჟურნალისტებთან გიორგი ვაშაძის განცხადების კომენტირებისას აღნიშნა.
კობახიძის თქმით, ისინი ასე გააგრძელებენ 12 პუნქტის შესრულების საბოტაჟს.
“მათ პარლამენტში ყოფნას არავითარი აზრი არ აქვს, ვაშაძის, ჯაფარიძე თუ არ ვცდები, გასულია უკვე, გასვლით არც არაფერი მიემატება პარლამენტს და არც არაფერი დააკლდება. რაც შეეხება მათ უხამს და შეურაცხმყოფელ გამონათქვამებს, აქედან ჩანს რა? – 12 პუნქტიდან პირველი არის დეპოლარიზაცია, მათი ერთ-ერთი თვითმიზანი ის არის, რომ ხელი შეუშალონ პირველივე პუნქტის შესრულებას. ისინი ასე გააგრძელებენ მოქმედებას, გააგრძელებენ 12 პუნქტის შესრულების საბოტაჟს, ეს არის მათი არჩევანი, საზოგადოება გამოიტანს დასკვნებს ამ ყველაფრიდან”, – განაცხადა კობახიძემ.
ცნობისათვის, ” პალიტრანიუსის” გადაცემა “თავისუფალ სტუდიაში” “სტრატეგია აღმაშენებლის” თავმჯდომარე გიორგი ვაშაძემ აღნიშნა, რომ მისი პარტია მზად არის პარლამენტი დატოვოს.
“მთავარია ეს არ იყოს ნაადრევი, თუმცა ეს მოხდება, როდესაც ის მოცემულობა დადგება, რომ საზოგადოება შეთანხმდება იმაში, რომ „ქართული ოცნებიდან“ არაფერი გამოვა, რომ ის არის პრორუსული ძალა, რომ კანდიდატის სტატუსი მათთან ერთად არ იქნება. ეს მოცემულობა რომ შედგება, ჩვენი ნაბიჯიც ამის პარალელურად იქნება“, – განაცხადა გიორგი ვაშაძემ.