აშშ-ის სახელმწიფო მდივანი, ენტონი ბლინკენი ეხმაურება ოფიციალური მოსკოვის გადაწყვეტილებას, შეაჩეროს მარცვლეულის ექსპორტის შესახებ შეთანხმება.
„შეთანხმების შეჩერებით, რუსეთი, თავისსავე დაწყებულ ომში, საკვებს კვლავ იარაღად იყენებს, რაც პირდაპირ გავლენას ახდენს დაბალი და საშუალო შემოსავლის მქონე ქვეყნებზე, სურსათის გლობალურ ფასებზე და ამწვავებს ისედაც მძიმე ჰუმანიტარულ კრიზისებს“, – აცხადებს ბლინკენი.
მოსკოვმა შეაჩერა გაეროს შუამავლობით მიღწეული შეთანხმება მარცვლეულის ექსპორტის შესახებ. შეთანხმების ფარგლებში, უკრაინიდან 9 მილიონ ტონაზე მეტი მარცვლეული გავიდა ექსპორტზე. უკრაინის საგარეო საქმეთა მინისტრის, დმიტრო კულებას განცხადებით, ამ გადაწყვეტილებით, რუსეთმა დაბლოკა 2 მილიონ;ი ტონა მარცვლეულის ექსპორტი, რომელიც უკვე 176 გემზეა დატვირთული. „ეს მარცვლეული საკმარისია 7 მილიონზე მეტი ადამიანის გამოსაკვებად“, – აცხადებს კულება.
ევროკავშირი რუსეთს მოუწოდებს, „მარცვლეულის ექსპორტის შესახებ შეთანხმებაში“ დაბრუნდეს.