ყველამ კარგად უნდა დავინახოთ, რომ ბოლო 10 წელიწადი არის ერთადერთი 10 წელიწადი საქართველოს დამოუკიდებლობის აღდგენის შემდგომ, როცა ქვეყანაში მშვიდობა იყო, – ამის შესახებ საპარლამენტო უმრავლესობის წევრმა, ირაკლი ჩიქოვანმა „ქრონიკაში“ განაცხადა.
„ზუსტად ეს ქმნის იმის შესაძლებლობას, რომ თითოეულ ქართველს, საქართველოს მოქალაქეს, რომელსაც საკუთარი თავის იმედი აქვს, რომელიც ინდომებს და იშრომებს, შეეძლება თავისი ქართული ოცნება აიხდინოს. ეს არის შესაძლებლობა და არა უკვე შემდგარი ფაქტი. ეს შესაძლებლობა თითოეულმა ჩვენმა თანამოქალაქემ უნდა გამოიყენოს და სახელმწიფო და საქართველოს ხელისუფლება გვერდით დაუდგება ისე, როგორც არასდროს. პრემიერის გამოსვლაში ძალიან მკაფიო და მთავარი გამოთქმა იყო: ჩვენთვის მთავარი სამოქმედო იქნება ჩვენი მოქალაქეების უსაფრთხოებისა და კეთილდღეობის უზრუნველყოფა“, – აღნიშნა ირაკლი ჩიქოვანმა.
22 სექტემბერს, საქართველოს პრემიერ-მინისტრმა ირაკლი ღარიბაშვილმა გაეროს 77-ე სესიის გენერალურ დებატებზე სიტყვით გამოსვლისას განაცხადა, რომ ქართული ოცნებები რეალობად იქცევა! ბოლო ათწლეულების განმავლობაში, ჩვენი ერი, რომლის ისტორიაც ათასობით წელს ითვლის, არაორდინარული გამოწვევების ფონზე გახდა გამძლეობისა და წინსვლის მაგალითი.