ვინც ამ პროცესსა და პროცედურას ემიჯნება, ბოლომდე ავლენს, რომ მისი მიზანია, როგორმე საბოტაჟი განახორციელოს 12 პუნქტის შესრულების პროცესის მიმართ, – ამის შესახებ პარტია „ქართული ოცნების“ თავმჯდომარემ ირაკლი კობახიძემ პარლამენტში ჟურნალისტებს სახალხო დამცველობის კანდიდატთა შერჩევის პროცესზე საუბრისას განუცხადა.
„ვინმეს არ მოსწონებოდა ეს პროცედურა, თუმცა ზოგიერთი ახერხებს, რომ განუდგეს ამ პროცესსაც კი. მნიშვნელობა არ აქვს – ჩვენ გვექნება თანამშრომლობა შესაბამის საპარლამენტო პარტიებთან, არასამთავრობო ორგანიზაციებთან. სწორედ ისინი შეარჩევენ კანდიდატურებს. ქულებით შეფასდება ყველა კანდიდატი, რომელიც ღია შერჩევაში მიიღებს მონაწილეობას და ამის შემდეგ მხოლოდ ოპოზიციური პარტიები დაასახელებენ კანდიდატებს. მხოლოდ ამის შემდეგ ჩაერთვება ამ საქმეში უმრავლესობა. ვინც ამ პროცესსა და პროცედურას ემიჯნება, ბოლომდე ავლენს, რომ მისი მიზანია, როგორმე საბოტაჟი განახორციელოს 12 პუნქტის შესრულების პროცესის მიმართ. ეს არის ერთად-ერთი ახსნა იმისა, რომ გარკვეული პოლიტიკური ძალები ემიჯნებიან ამ აბსოლუტურად ღია და გამჭვირვალე პროცედურასაც კი“, – განაცხადა კობახიძემ.
სახალხო დამცველის კანდიდატთა შერჩევის პროცესი დაიწყო.