შაბათს 20 აგვისტოს ტბათანაზე, ფესტივალი ,,ჩვენი მთები კვლავ გვეძახის“ გაიმართა. ღონისძიება ახმეტის მუნიციპალიტეტის მერიის მხარდაჭერითა და ,,თუშების სათემო საბჭო“-ს ორგანიზებით ჩატარდა. ფესტივალის მიზანი იყო ტბათანას აღორძინება და წოვა თუშების დაბრუნება მამა-პაპისეულ ადგილებზე.
ღონისძიებას ახმეტის მუნიციპალიტეტის მერი ალექსი ფიცხელაური, მერიის და საკრებულოს წარმომადგენლები და სხვადასხვა მოწვეული სტუმრები ესწრებოდნენ.ალექსი ფიცხელაურმა დამსწრე საზოგადოებას მიულოცა ფესტივალის დაფუძნება და აღნიშნა რომ ტბათანაზე ფესტივალი მერიის მხარდაჭერით ყოველწლიურად ჩატარდება.ფესტივალზე წარმოდგენილი იყო ადგილობრივი მეწარმეების მიერ წარმოებული პროდუქცია და წოვა-თუშური სამზარეულო, რომლის დაგემოვნება შეეძლოთ ფესტივალის მონაწილეებს. ღონისძიებას მუსიკალურად აფორმებდნენ: ჯგუფი ,,წოვათა“, ანსამბლი ,,ბახტრიონი“ და ქორეოგრაფიული ანსამბლი ,,გენია”. ასევე, ადგილობრივმა ახალგაზრდებმა წაიკითხეს თუში პოეტების: ადამ ბობღიაშვილის, ბახვა ბაიხოიძის, იოსებ ლონგიშვილის და მურთაზ ნაკუდაშვილის ლექსები.
