2020 წლის არჩევნებში „სამართლიანმა არჩევნებმა“ გააყალბა 2 მონაცემი აბსოლუტურად შეგნებულად: პირველი – მათ თქვეს, რომ თითქოს 4%-იანი ცდომილება იყო ხმების პარალელურ დათვლასა და ცესკოს მონაცემებს შორის, რაც იყო ტყუილი და ეს ტყუილი გამოვააშკარავეთ ჩვენ, „ქართულმა ოცნებამ“ რამდენიმე დღეში, თუმცა თვენახევარი დასჭირდა „სამართლიან არჩევნებს“, სანამ ამას აღიარებდა, – ამის შესახებ მოძრაობა „ხალხის ძალის“ წევრმა, დეპუტატმა სოზარ სუბარმა განაცხადა.
„მეორე მონაცემი იყო შემდეგი: მათ თქვეს, რომ უბნების 8%-ში იყო მეტობა. გაირკვა, რომ მთელი საქართველოს მასშტაბით მხოლოდ 19 უბანზე იყო მეტობა დაფიქსირებული და ეს იყო სულ 25 ბიულეტენი. რაც შეეხება აშშ-ის საელჩოს განცხადებას, რომ ეს არის ყველაზე სანდო სადამკვირვებლო ორგანიზაცია, ეს არის აბსოლუტურად მიკერძოებული განცხადება. “, – განაცხადა სუბარმა.
19 აგვისტოს ამერიკის შეერთებული შტატების საელჩომ გაავრცელა განცხადება, რომელშიც საელჩო „ისფედს“ საქართველოს ერთ-ერთი ყველაზე სანდო და გამოცდილ საარჩევნო სადამკვირვებლო ორგანიზაციად მოიხსენიებს. საელჩოს პოზიციის თანახმად, ამ ორგანიზაციის „საარჩევნო რეფორმების პარლამენტის სამუშაო ჯგუფში არდაშვება პირდაპირ ეწინააღმდეგება ევროკომისიის რეკომენდაციას“.
„ქართული ოცნების“ თავმჯდომარემ, ირაკლი კობახიძემ, ჟურნალისტებს პარტიის ოფისში განუცხადა, რომ აშშ-ის საელჩოს განცხადებები, ISFED-თან დაკავშირებით, საზოგადოებაში არსებულ გაურკვევლობას კიდევ უფრო ზრდის.