ეს რომ დამაჯერებელი იყოს, „ნაციონალურ მოძრაობაში“ სერიოზული ტრანსფორმაცია უნდა დაიწყოს. შეუძლებელია, რომ სააკაშვილი პოლიტიკიდან წავიდეს და „ნაცმოძრაობა“ იგივე ფორმით დარჩეს, როგორიც ახლა არის, – ამის შესახებ „გირჩის“ წევრმა, დეპუტატმა ალექსანდრე რაქვიაშვილმა განაცხადა.
„თუ დავინახეთ, რომ პოლიტიკოსების ნაწილი გადის პოლიტიკიდან, ზოგი პირიქით დაწინაურდა და პრინციპულად იცვლება „ნაციონალური მოძრაობა“, მაშინ მიხეილ სააკაშვილის ეს განცხადება დამაჯერებელი იქნება და არ მგონია მთავრობას ჰქონდეს რაიმე არგუმენტი, რატომ არ უნდა გაუშვას სხვა ქვეყნის მოქალაქე ციხიდან, რომელიც ჩვენ ქვეყანაში არაფრითაა დაკავებული“, – აღნიშნავს რაქვიაშვილი.
მიხეილ სააკაშვილის ადვოკატმა, ვალერი გელბახიანმა „ქრონიკას“ განუცხადა, რომ ყოფილი პრეზიდენტი ქართულ პოლიტიკაზე უარს ამბობს და „ნაციონალურ მოძრაობასთან“ კავშირს წყვეტს. „ნაციონალური მოძრაობის“ წევრი ბაჩო დოლიძე კი აცხადებს, რომ მიხეილ სააკაშვილის პარტიიდან დისტანცირების საკითხი დღის წესრიგში არ დგას.